Міхалок: На якой мове я размаўляю, не важна. Галоўнае, што магу прабіць нармальна

У вялікім інтэрв’ю hromadske.tv Сяргей Міхалок распавёў пра тое, чаму знаходзіцца ва Украіне, параўнаў беларусаў і ўкраінцаў, а таксама падзяліўся творчымі планамі.

Гутарка пачалася адразу ж вельмі цікавым чынам, калі Міхалок расказаў пра асаблівасці беларускага характару:

— Можа і ў Беларусі будзе калісьці «Грамадскае»…

— Грамадзянскае — будзе па-беларуску.

— А мне казалі, «грамадскае».

— Хм, грамадскае. Я думаю, што спрэчка была б доўга ў беларусаў. У беларусаў з беларусамі.

— А чаму?

— Няма магчымасці па вертыкалі нешта змяніць, таму ўсе па гарызанталі п****ць між сабой. Беларусы такія. Зверху залівае, але да яго страшна пайсці, таму грукаеш да суседа злева. Вось гэта беларусы такія.

Сяргей таксама выказаўся наконт таго, што яму падабаецца ў цяперашняй Украіне:

— Украіна — гэта нараджэнне новай зоркі, новай эпохі. Новая сістэма каардынатаў. Нейкая новая трансгалактычная рэлігія. Тое, што тут адбываецца — гэта цуд, асабіста для мяне… Гэта першае калектыўнае бессвядомае, якое вылілася не ў калектыўны крэтынізм, а ў калектыўнае стваральнае.

Украіна цяпер — гэта месца сілы. Новы Тыбет, новая Шамбала. Я кажу не жартам, а дакладна і цалкам пераканана. Я тут, каб атрымаць асалоду, задавальненне. Узяць у гэтым удзел. Новы час, новае жыццё — было ў маёй песні. І вось тут новы час, новае жыццё.

Але ў той жа момант Міхалок абурыўся стаўленню некаторых украінцаў да той сітуацыі, якая зараз пануе ў краіне: 

— Вы самі, ваша грамадства, вызначылі свой далейшы лёс. Дык чаму вы зноў чакаеце нейкага месію, спадзеяцеся на кагось зверху?

Шмат хто думае, што барацьба з вечнымі праблемамі вырашаецца чароўнай палачкай, як у казцы «Папялушка», нехта павінен махнуць. І галоўнае, што шмат хто верыць у канкрэтных людзей. Яны не вераць у багоў, у прызначэнне, у касмічны навігатар. Але яны вераць, што вось Яцанюк павінны быў усё змяніць! Ці вось Парашэнка, вось менавіта канкрэтна ён павінен прыйсці да мяне дамоў, вымыць пад’езд і дзірку ў асфальце заляпіць. Мяне гэта трохі, скажам так, весяліць. Я тут з Беларусі. Да вас прыехала шмат беларусаў дапамагаць вам будаваць тую будучыню, якая стане прыкладам і для беларусаў, і для расіян. І грузіны прыехалі. Найлепшыя! Я што, горшы беларус? Ды я самы лепшы ўвогуле!

На пытанне, чаму ўсё-такі Міхалок зараз не жыве ў Беларусі, прагучаў наступны адказ:

— Я для Беларусі застаюся вольным, жыву тут, але радзіма разам са мною. І таму я пішу новы альбом BRUTTO «Родны край», які і для беларусаў, і для ўкраінцаў, і для расіян. І таму я ўплываю на Беларусь, неабавязкова знаходзячыся менавіта там.

Пункт зборкі для беларусаў — тут. І таму тут жа Жызнеўскі праявіў свае якасці, ты ж мог таксама сказаць: «А чаго гэта ты не ў Беларусі змагаешся, чаго ты сюды прыехаў змагацца?» Ды таму, што тут галоўны Рубікон, тут галоўная барыкада. Ну ты ж мяне трошкі падкалоў, «чаго ты не там?». Таму што мяне маглі там пасадзіць. І што б я там рабіў? Выйшаў бы зламаны праз 7-8 гадоў. Я задзірлівы, я неспакойны чалавек, сядзеў бы там па карцарах, што б я зрабіў там для свабоды і для сваёй Беларусі?

Таксама вельмі цікавыя думкі выказаў музыка наконт моўнага пытання і той увагі, якая цяпер яму надаецца:

— Ва Украіне пытанне мовы — гэта пытанне нумар адзін. Людзі гатовыя лепш пайсці страляць, чым вывучыць мову. Я лічу, гэтае пытанне не павінна быць настолькі сур'ёзным. Я не ведаю мовы, затое я ведаю, якім павінен быць беларус. Я ведаю яго код генетычны, адчуваю яго, і таму на якой мове я размаўляю — не важна. Галоўнае, што я магу сціснуць кулак і прабіць нармальна».

У гутарцы было шмат яшчэ чаго цікавага, таму раім паглядзець яе цалкам.

• 0
• 0
• 0
• 0
• 0
• 0
• 0
• 0