На афіцыйным сайце Дзяржаўнай архіўнай службы Беларусі адкрыўся праект «Клясык беларускай літаратуры Вінцэнт Дунін‑Марцінкевіч».
На афіцыйным сайце Дзяржаўнай архіўнай службы Беларусі адкрыўся праект «Клясык беларускай літаратуры Вінцэнт Дунін‑Марцінкевіч». Ён прымеркаваны да 200‑годзьдзя з дня нараджэньня паэта, драматурга й тэатральнага дзеяча, расказала карэспандэнцы БЕЛТА старшая навуковая супрацоўніца Беларускага навукова‑дасьледчага цэнтру электроннай дакумэнтацыі Дыяна Глазкоўская.
Мэта праекту — адзначыць вялікі ўнёсак Вінцэнта Дуніна‑Марцінкевіча ў разьвіцьцё беларускай літаратуры, станаўленьне прафэсійнага нацыянальнага тэатру, яшчэ раз нагадаць пра творчы й жыцьцёвы шлях пісьменьніка. Стварэньне падобнай выставы матэрыялаў будзе таксама спрыяць пашырэньню ведаў па беларускай літаратуры й гісторыі ХІХ стагодзьдзя.
Рубрыка падзелена на чатыры асноўныя разьдзелы, дзе разьмешчана каля 140 розных дакумэнтаў. Тут чытач можа атрымаць даведачную інфармацыю пра асобу, творчасьць Дуніна‑Марцінкевіча, пазнаёміцца з рэдкімі архіўнымі дакумэнтамі, зьвесткамі пра ягоныя творы, фатаграфіямі. У віртуальную экспазыцыю ўвайшлі таксама ўспаміны сучасьнікаў драматурга.
Праект уключае і матэрыялы пра першыя выданьні твораў Дуніна‑Марцінкевіча. Прычым кожнае зь іх прэзэнтавана выявай вокладкі, анатацыяй і цытатамі. Усяго прадстаўлена 15 выданьняў, у ліку якіх 8 зборнікаў вершаваных твораў, тры п’есы, кніга зь перакладам.
На жаль, шмат дакумэнтаў пра Дуніна‑Марцінкевіча, а таксама аўтографы твораў пісьменьніка не дайшлі да нашых дзён, частка зь іх страцілася ў часы Вялікай Айчыннай вайны.
Разам з цэнтрам электроннай дакумэнтацыі віртуальную выставу падрыхтавалі Нацыянальны гістарычны архіў, Беларускі дзяржаўны архіў кінафотадакумэнтаў, Беларускі дзяржаўны архіў‑музэй літаратуры й мастацтва ды іншыя пры ўдзеле дэпартамэнту па архівах і справаводзтве Міністэрства юстыцыі Беларусі.
Новая выстава будзе працаваць паводле прынцыпу ўжо створанага віртуальнага праекту «Клясыкі сусьветнай літаратуры Янка Купала й Якуб Колас. Да 125‑годзьдзя з дня нараджэньня».
Каментары