Лукашэнка дазволіў выдзяляць дзяржаўнае арэнднае жытло асобам не з дзяржслужбы, але ўключаным у кадравыя рэестры кіраўніка дзяржавы, урада, выканкамаў
Аляксандр Лукашэнка дазволіў выдзяляць іншым грамадзянам арэнднае жыллё, прызначанае для дзяржаўных служачых. 24 чэрвеня ён падпісаў указ № 258, які ўносіць адпаведныя змены ва ўказ № 535 ад 17 лістапада 2014 года, што ўстанаўлівае парадак давання арэнднага жылля дзяржслужачым і пералік пасадаў, якім такое жыллё належыць выдзяляць, паведамляе прэс-служба прэзідэнта.
У новым указе гаворыцца, што пры адсутнасці неабходнасці забеспячэння арэндным жыллём дзяржаўных служачых прадугледжваецца магчымасць давання гэтага жылля іншым грамадзянам, якія займаюць пасады, уключаныя ў кадравыя рэестры кіраўніка дзяржавы, урада, аблвыканкамаў, Мінскага гарвыканкама, раённых, гарадскіх выканкамаў. Пры гэтым умовамі давання ім такога жылля з'яўляюцца адсутнасць ва ўласнасці і (або) у валоданні і выкарыстанні жылых памяшканняў у населеным пункце па месцы працы або службы, а таксама індывідуальнага хадайніцтва дзяржорганаў і арганізацый, якія з'яўляюцца іх наймальнікамі.
Рашэнні аб даванні арэнднага жылля будуць прымацца Кіраўніцтвам справамі прэзідэнта, аблвыканкамамі і Мінскім гарвыканкамам. Арэнднае жыллё будзе выдзяляцца часова да ўзнікнення неабходнасці яго выдзялення дзяржаўным служачым, але не звыш тэрміну працоўных ці службовых адносінаў з грамадзянамі.
Пералік пасадаў, пры займанні якіх магчымае атрыманне арэнднага жылля для дзяржслужачых, уключае 61 пазіцыю. На перыяд працоўных адносінаў па выдзяленне арэнднай кватэры можа звярнуцца ў тым ліку і прэзідэнт.
Кошт будаўніцтва 1 кв. м агульнай плошчы арэнднага жылля для чыноўнікаў не павінна перавышаць 8,5 млн рублёў, «калі іншае не ўстаноўлена прэзідэнтам». Кватэры паводле жадання арандатара могуць быць абсталяваныя бытавой тэхнікай і іншай маёмасцю, пры гэтым расходы на іх набыццё абмежаваныя 25% ад каштарыснага кошту будаўніцтва жылля.
Плошча зямельнага ўчастка, які выдзяляецца для будаўніцтва аднакватэрнага дома для здачы ў арэнду дзяржслужачым, не павінна перавышаць 1 тыс. кв. м, а агульная плошча дома — 150 кв. м. Для арэндных кватэр у шматкватэрных дамах дапушчальная плошча абмяжоўваецца 130 кв. м.
Каментары