Расія забараніла імпарт кветак з Галандыі з-за прысутнасці ў гэтай прадукцыі каранцінных арганізмаў, гаворыцца ў паведамленні Федэральнай службы па ветэрынарным і фітасанітарным наглядзе (Рассельгаснагляд).
«Рассельгаснагляд прапанаваў нацыянальным арганізацыям па каранціне і ахове раслін краін Еўрасаюза цалкам прыпыніць фітасанітарную сертыфікацыю галандскіх зрэзаных кветак для пастаўкі ў Расію», — гаворыцца ў паведамленні ведамства.
Як патлумачыў памочнік кіраўніка Рассельгаснагляду Аляксей Аляксеенка, забарона будзе прадоўжаная або знятая пасля тэхнічных кансультацый «з кампетэнтнымі структурамі Еўрасаюза па наяўнай праблеме», якія расійскае ведамства мае намер правесці ў бліжэйшы час.
Паводле яго слоў, забарона тычыцца толькі кветак, вырабленых на тэрыторыі Нідэрландаў, на транзіт кветак яна не распаўсюджваецца.
Раней Рассельгаснагляд заяўляў, што ў галандскіх кветках быў знойдзены заходні кветкавы трыпс — дробная казурка, якая жыве на кветках і лісці. Як адзначалася, трыпс небяспечны тым, што з'яўляецца пераносчыкам розных вірусаў.
Калі ў чэрвені Еўрасаюз паведаміў аб працягу эканамічных санкцый, расейскія ўлады заявілі, што ў адказ могуць увесці забарону на ўвоз кандытарскіх вырабаў, кветак і рыбных кансерваў з тых краін, якія ўвялі санкцыі ў дачыненні да Расіі.
Цяпер чытаюць
Арыштаваны дырэктар Палаца Рэспублікі, адзін з арганізатараў Марафона адзінства6
Каментары