У Мінску колькасць афіцыйных беспрацоўных за год вырасла больш як у чатыры разы
Колькасць беспрацоўных, зарэгістраваных у сталічных органах па працы, занятасці і сацыяльнай абароне, на канец ліпеня 2015 года склала 6,6 тыс. чалавек. Гэта ў 4,3 разу больш, чым на канец ліпеня 2014 года, і на 3,6% больш, чым на канец чэрвеня 2015 года.
Такія даныя апублікавала галоўнае статыстычнае ўпраўленне Мінска са спасылкай на камітэт па працы, занятасці і сацыяльнай абароне Мінгарвыканкама.
Узровень зарэгістраванага беспрацоўя на канец ліпеня 2015 года склаў 0,6% ад эканамічна актыўнага насельніцтва (на канец ліпеня 2014 года — 0,1%).
У эканоміцы Мінска ў студзені—ліпені 2015 года было занята 1 млн. 80,5 тыс. чалавек, што на 0,9% менш, чым у студзені—ліпені 2014 года.
Арганізацыямі (без мікраарганізацый і малых арганізацый без ведамаснай падпарадкаванасці) ў ліпені 2015 года было працаўладкавана 15,9 тыс. чалавек (2,4% сярэднямесячнай колькасці), у тым ліку на дадаткова ўведзеныя працоўныя месцы — 1,3 тыс. чалавек, ці 8,2% ад агульнай колькасці прынятых.
Звольнена па розных прычынах 16,5 тыс. чалавек (2,5% сярэднямесячнай колькасці), з іх 4% — за прагул і іншыя парушэнні працоўнай дысцыпліны, 0,6% — у сувязі са скарачэннем колькасці ці штату работнікаў, ліквідацыяй арганізацый.
Каэфіцыент замяшчэння работнікаў (суадносіны колькасці працаўладкаваных да колькасці звольненых) у ліпені 2015 года склаў 0,967 (у ліпені 2014 года — 1,054). Колькасць звольненых работнікаў арганізацый Мінска перавысіла колькасць працаўладкаваных на 0,5 тыс. чалавек (у ліпені 2014 года колькасць працаўладкаваных перавысіла колькасць звольненых на 1 тыс. чалавек).
Цяпер чытаюць
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ6464
Каментары