Уступленне Беларусі ў СГА, паспяховая праца ў ЕАЭС і Саюзнай дзяржаве непарыўна звязаны з рэформамі, заявіў старшыня Савета Рэспублікі Міхаіл Мясніковіч 23 кастрычніка ў Мінску на міжнароднай канферэнцыі «Праблемы прагназавання і дзяржаўнага рэгулявання сацыяльна-эканамічнага развіцця».
«Калі не праводзіць рэформаў, а фарсіраваць інтэграцыйныя працэсы на базе таго, што ёсць, то вынікі могуць апынуцца нават адмоўнымі», — папярэдзіў ён.
Мясніковіч адзначыў, што ўступленне ў СГА прынясе змяненне структуры эканомікі, рынку працы і заробкаў, абвострацца праблемы шэрагу прадпрыемстваў, зменіцца магчымасць падтрымкі вёскі, узрасце нагрузка на эканоміку ў цэлым.
«Але адкрываюцца вялікія магчымасці для рэалізацыі нашых тавараў на сусветных рынках»,— упэўнены ён. Кіраўнік Савета Рэспублікі падкрэсліў, што ўступленне ў СГА не будзе азначаць аўтаматычнага абнулення ўвазных мытных пошлін. «Разам з тым СГА валодае інструментамі, якія дазваляюць абараняць тую ці іншую галіну. Трэба ў гэтым кірунку папрацаваць», — заклікаў Мясніковіч.
«Што тычыцца ЕАЭС, — працягваў ён, — то падпісаны ў мінулым годзе дагавор аб яго стварэнні не апраўдвае многіх чаканняў. Шмат у чым — з-за пераходнага перыяду да 2020 года. Акрамя таго, толькі па гандлі таварамі існуе каля 400 бар'ераў. Усё гэта не магло не адбіцца на аб'ёме ўзаемнага гандлю ЕАЭС з трэцімі краінамі, які знізіўся на траціну».
Мясніковіч таксама заявіў, што Расія — гэта галоўны канкурэнт беларускіх тавараў: «Гэта адзін і той жа сегмент цэнаў, узровень якасці, але сабекошт ў іх ніжэйшы: цана на газ для прадпрыемстваў у Расіі ніжэйшыя ў тры разы, электраэнергіі — у 1,5 разы, падатковая нагрузка — на 10-15%».
Старшыня верхняй палаты заклікаў Мінэканомікі і яго НДІ пралічыць мэтазгоднасць залічэння ў бюджэт газавай дэльты, калі канчатковаму спажыўцу ў Беларусі газ прадаюць значна даражэй, чым ён каштуе на ўваходзе ў краіну.
«Зразумела, што для бюджэту з гэтай дэльтай спакайней, але можа знізіць гэтую нагрузку, забяспечыць зніжэнне сабекошту і павысіць канкурэнтаздольнасць нашых тавараў?» — пацікавіўся Мясніковіч. Пра тое, ці варта пры гэтым ліквідаваць перакрыжаванае субсідаванне і падняць цану для насельніцтва спікер не ўзгадваў.
Каментары