Што цяпер з архівам КДБ аб рэпрэсіях у БССР, які змаглі здабыць былыя сілавікі? Калі яго апублічаць?
У 2022 годзе стала вядома, што аб'яднанне былых сілавікоў «Байпол» атрымала доступ да архіву КДБ аб савецкіх рэпрэсіях у Беларусі. Пасля раздзялення арганізацыі на дзве база перайшла да новастворанага «Белпола». Яе прадстаўнік Уладзімір Жыгар расказаў, як цяпер ідзе апрацоўка інфармацыі.
«Пасля рэформы 2023 года (аб падзяленні на «Белпол» і «Байпол» — НН) архіў застаўся ў нас, і мы яго перадалі адной арганізацыі для аналізу. Ну і там усё застопарылася. Як звычайна, не хапае рэсурсаў», — сказаў Уладзімір Жыгар «Нашай Ніве».
Сам «Белпол» таксама не можа заняцца апрацоўкай файла, бо мае шмат іншай працы. Некалькі месяцаў таму працу па кірунку вырашылі аднавіць, але пакуль «Белпол» не можа сказаць, ці гэта ўдасца.
Жыгар таксама адзначыў, што не можа агучыць назву арганізацыі, якая займалася апрацоўкай базы.
У 2022 годзе ў распараджэнні «Байпола» аказаўся алічбаваны архіў КДБ з інфармацыяй пра рэпрэсаваных за Саветамі беларусаў. У ім — тысячы і тысячы прозвішчаў, але дакладная лічба публічна не называлася.
У 2023 годзе «Байпол» раскалоўся на дзве часткі: пад старой назвай засталіся працаваць Аляксандр Азараў і Станіслаў Лупаносаў, а Мацвей Купрэйчык, Уладзімір Жыгар і некаторыя іншыя былыя сілавікі пачалі працаваць пад новым брэндам «Белпол».
Каментары
Прабачце, але ў Беларусі амаль у кожнай сям'і ёсць рэпрэсаваныя!!!
Акрамя сем'яў нквдшнікаў.
Выкладайце архіў для ўсіх у адкрыты доступ!
Самі прааналізуем і знойдзем сваіх блізкіх, якіх знішчыла расейска-савецка-камуністычна-нквдшная ўлада.