«Учора бліжэй да вечара, незадоўга да пачатку чарговага спектакля фестывалю, я адчуў неймавернае пачуцце гонару за краіну, у якой нарадзіўся, — піша ў сваім фэйсбуку Мікалай Халезін. —
І адбылося гэта ў рэстаране The Cut, размешчаным у тэатры Young Vic. А крыніцай гэтага самага гонару сталі шэф-кухар Андрэй Рэзнікаў і кулінар Арына Лісецкая, якія прэзентавалі тут стравы беларускай кухні.
Спецыяльнае меню з трох страў, прымеркаванае да фестывалю Stage a Revolution, на працягу двух тыдняў будзе падавацца тут для наведвальнікаў рэстарана і гледачоў.
Далікатная юшка, сабраная з двух булёнаў — курынага і рыбнага, запраўленая шафранам, і пададзеная са стартарамі — канапэ на жытнім хлебе з курыным і грыбным паштэтамі. Свіная шыя, абсмажаная і тушаная ў духоўцы, з запечанай бульбай, фаршаванай сырам рыкота і беконам. На дэсерт — пухкі спонж з макам, з кастардам і свежымі ягадамі. Усе стравы гістарычна належаць да літвінскай кухні з вельмі невялікімі карэкціроўкамі і праўкамі.
Да чаго гэта я пішу. Да таго, што мне больш не хочацца чуць слова «дранік» у дачыненні да беларускай кухні. Гэтае слова павінна адпачыць — яно выбрала ліміт згадак на бліжэйшыя пару дзясяткаў гадоў. І паверце, здзівіць кагосьці ў свеце бульбянымі аладкамі немагчыма. Яшчэ і таму, што практычна кожная еўрапейская кулінарыя мае тую ці іншую інтэрпрэтацыю гэтай стравы ў сваім асартыменце. І калі мы хочам прадстаўляць сваю краіну ў свеце, як сучасную і крэатыўную, варта адмовіцца ад лубочных вобразаў у гэтай працы».
Цяпер чытаюць
Перасцярогі перад «новымі Жыткавічамі». Кіеў дарма бачыць пагрозу ў будаўніцтве мастоў цераз Прыпяць і Мухавец22
Каментары