Румынія адклікае свайго пасла з Масквы і высылае аднаго з расійскіх дыпламатаў
Румынія вырашыла адклікаць свайго пасла ў Расіі для кансультацый і выслаць аднаго з расійскіх дыпламатаў пасля серыі выпадкаў парушэння паветранай прасторы краіны расійскімі беспілотнікамі тыпу «Шахед», піша «Еўрапейская праўда».
Як паведамілі ў Міністэрстве замежных спраў Румыніі, пасля выкліку расійскага пасла яму быў уручаны афіцыйны пратэст. Румынскі бок заявіў, што на працягу трох дзён запар расійскія беспілотнікі парушалі паветраную прастору краіны. Падчас сустрэчы расійскаму дыпламату паказалі абломкі аднаго з дронаў, які быў афіцыйна ідэнтыфікаваны як расійскі.
У МЗС Румыніі заявілі, што гэтыя дзеянні Расіі з'яўляюцца незаконнымі і безадказнымі. Бухарэст падкрэсліў, што паветраная прастора Румыніі адначасова з'яўляецца часткай паветранай прасторы НАТА і Еўрапейскага саюза, таму такія інцыдэнты лічацца непрымальнымі.
Румынскія ўлады заявілі, што менавіта Расія нясе адказнасць за парушэнні і рост напружанасці ў рэгіёне.
Акрамя гэтага, расійскаму паслу паведамілі пра рашэнне аб выдварэнні аднаго з супрацоўнікаў расійскага пасольства ў Бухарэсце. Гэтаму дыпламату далі пяць дзён, каб пакінуць тэрыторыю Румыніі.
Таксама Румынія адклікае свайго пасла з Масквы для правядзення кансультацый. Улады краіны заявілі, што будуць і надалей каардынаваць свае дзеянні з партнёрамі па НАТА і ЕС ды прымаць неабходныя меры для абароны нацыянальнай бяспекі і грамадзян.
Раней, 26 ліпеня, Румынія ўжо трэці дзень запар прымяніла авіяцыю для знішчэння беспілотніка, які парушыў яе паветраную прастору. Першае баявое прымяненне румынскіх знішчальнікаў для збіцця такога апарата адбылося 24 ліпеня. Пазней было пацверджана, што гэта быў беспілотнік тыпу «Шахед».
Перад гэтым ужо неаднаразова фіксаваліся выпадкі, калі расійскія дроны заляталі на тэрыторыю Румыніі і падалі ў памежных раёнах каля Дуная падчас расійскіх удараў па ўкраінскіх партах.
Адным з найбольш сур'ёзных выпадкаў стаў інцыдэнт у канцы мая, калі беспілотнік «Шахед» даляцеў да горада Галац на мяжы з Украінай і ўрэзаўся ў верхні паверх шматпавярховага дома, выклікаўшы значныя пашкоджанні.
Цяпер чытаюць
Латвія «па тэхнічных прычынах» закрыла мяжу з Беларуссю17
Каментары