15 студзеня набыў моц прысуд па крымінальнай справе аб гібелі сямігадовай дзяўчынкі ў кобрынскім аквапарку, паведаміў старшы пракурор аддзела пракуратуры Брэсцкай вобласці Генадзь Буры.
10 лістапада 2015 года суд Кобрынскага раёна прызнаў 41-гадовую настаўніцу Завершскай базавай школы Драгічынскага раёна і 39-гадовую былую настаўніцу гэтай школы вінаватымі ў неналежным выкананні абавязкаў па арганізацыі бяспекі, жыцця і здароўя малалетняга, што пацягнула па неасцярожнасці смерць малалетняга, пры адсутнасці прыкмет службовага злачынства (ч. 2 арт. 165 КК).
Кожная з жанчын прысуджаная да трох гадоў шасці месяцаў абмежавання волі без накіравання ў папраўчую ўстанову адкрытага тыпу са штрафам у памеры 100 базавых велічынь (18 млн. рублёў).
Згодна з прысудам яны таксама пазбаўленыя права займаць пасады настаўніка і выхавальніка ва ўстановах адукацыі тэрмінам на пяць гадоў.
За бацькамі загінулага малалетняга дзіцяці прызнана права на матэрыяльную кампенсацыю маральнага ўрону.
Падчас судовага пасяджэння ўстаноўлена, што 12 чэрвеня абвінавачваныя суправаджалі групу з 20 малалетніх дзяцей у экскурсійнай паездцы з вёскі Заверша ў Кобрын, адным з месцаў наведвання быў мясцовы аквапарк. Супрацоўнікі аквапарку правялі адпаведны інструктаж з педагогамі. Нягледзячы на тое што настаўнікі ведалі пра абавязак сачыць за дзецьмі, яны гэтага не рабілі.
Сямігадовую вучаніцу Завершскай базавай школы, якая не ўмела плаваць, дастаў з вады наведвальнік аквапарку. Дзяўчынка была знойдзена ім у глыбокай частцы басейна, дзе не павінна была знаходзіцца, пра што педагогі былі праінструктаваныя.
Пацярпелая была ў стане клінічнай смерці ў выніку ўтаплення. Дзяўчынку спачатку даставілі ў Кобрынскую цэнтральную раённую бальніцу, затым у Брэсцкую дзіцячую абласную бальніцу, дзе 26 чэрвеня ў рэанімацыйным аддзяленні, не прыходзячы ў прытомнасць, яна памерла.
На момант вынясення прысуду 39-гадовая настаўніца са школы ўжо звольнілася.
«Нягледзячы на тое што абвінавачваныя сваю віну прызналі ў поўным аб'ёме, іх абаронцы абскардзілі прысуд, палічыўшы, што ў дзеяннях жанчын няма складу злачынства, — адзначыў Буры. — 15 студзеня судовая калегія па крымінальных справах Брэсцкага абласнога суда пакінула гэтыя скаргі без задавальнення, прызнаўшы довады абаронцаў непераканаўчымі і неабгрунтаванымі».
У частцы пакарання абвінавачваным прысуд першай інстанцыі пакінуты без змянення.
Паводле пратэсту пракуратуры Кобрынскага раёна з прысуду выключанае ўказанне аб прызнанні абвінавачваных неналежнымі адказчыкамі па грамадзянскім іску аб матэрыяльнай кампенсацыі маральнага ўрону бацькам загінулай дзяўчынкі.
Цяпер чытаюць
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м2
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1111
Каментары