«Як толькі чуюць пра Расію — дык усё… У чым праблема?» У Мінску не хочуць здаваць кватэру чалавеку з расійскім пашпартам

«Беларусь. Мінск. Я ўжо ў роспачы. Мы — пара, малады чалавек з расійскім пашпартам, шукаем кватэру для арэнды. Бюджэт — 300—350 даляраў у месяц. З дамовай найму (нікога рэгістраваць у жыллі не трэба, патрэбна толькі дамова — я тэлефанавала ў АГіМ і ўдакладняла). Я ўжо атрымала 20 адназначных адмоў ад людзей, якія здаюць кватэры: як толькі чуюць пра Расію — дык усё…

Але я не разумею, у чым праблема… Я проста хачу жыць спакойна, плаціць вам грошы за арэнду і працаваць.

Веру ў сілу Threads», — напісала дзяўчына.

Павялічыць

У каментарах яна растлумачыла, што сама ўжо 10 гадоў жыве ў Гомелі і паспела прывязацца да Беларусі. Яе малады чалавек нядаўна атрымаў працоўны кантракт у Мінску, і пара плануе жыць менавіта там. Але ж пошук нерухомасці ператварыўся ў сапраўдны квэст.

Да допісу беларусы паставіліся скептычна. Некаторыя напісалі, што з цяперашнімі цэнамі любому чалавеку будзе складана знайсці кватэру ў беларускай сталіцы за 300-350. Расіянцы раілі падняць бюджэт хаця б на 100 даляраў, а лепей — больш.

Адна з жанчын, якая здае кватэру, у каментарах адзначыла, што асабіста яе засмуціла б у іх гісторыі адсутнасць штампа ў пашпарце. Бо яна ўжо сутыкнулася з сітуацыяй, калі пара пасварылася праз некалькі месяцаў пасля падпісання дамовы арэнды, і хлопец з’ехаў, а даходу адной дзяўчыны не хапала на аплату кватэры. У выніку для гаспадыні гэта скончылася некалькімі месяцамі матання нерваў. Кажа, цяпер прынцыпова здае толькі людзям, якія афіцыйна ў шлюбе.

Шмат хто напісаў, што цалкам можна зразумець беларусаў, якія не хочуць здаваць уласную нерухомасць замежнікам. Бо былі ўжо выпадкі, калі нядобрасумленныя арандатары проста з'язджалі, паленаваўшыся афіцыйна скасаваць дамову. У такіх сітуацыях уладальніку кватэры часам прыходзіцца звяртацца ў суд. Бо пакуль дамова не скасавана, чалавеку неабходна плаціць падатак за здачу кватэры, якая фактычна прастойвае — пераздаць яе афіцыйна новаму чалавеку амаль немагчыма.

Плюс неабходна памятаць пра тое, што беларусы абавязаны паведамляць МУС пра замежнікаў, якім здаюць кватэры. Арэндадаўцам, якія гэта не робяць, пагражае штраф.

Таму расіянцы раілі са старту прапаноўваць гаспадарам кватэры перадаплату за 3‑5 месяцаў, каб супакоіць тых.

Але ж, канечне, былі ў каментарыях і тыя, хто шчыра прызнаваўся, што не стаў бы здаваць менавіта грамадзянам Расіі, бо не вельмі хоча бачыць іх у Беларусі ў прынцыпе.

• 66
• 0
• 16
• 2
• 1
• 1
• 0
• 1