У мінскай «Зялёнай гавані» з’явілася бясплатная лыжная траса. Яна праходзіць па полі для гольфа побач з жылымі кварталамі. Пакатацца можна бясплатна, але трэба ўзяць з сабой лыжы і неабходны інвентар, піша Realt.by.
Траса атрымалася эксклюзіўнай і атмасфернай. Яна наўрад ці падыдзе для масавых катанняў. Хутчэй яе ацэняць тыя, хто аддае перавагу спакойнаму адпачынку і пагружэнню ў прыродную ідылію. Для лыжнікаў на акадэмічным полі расчысцілі невялікую паласу, якая пятляе ўздоўж пакрытых снегам лужкоў і забіраецца на акуратныя «швейцарскія» пагоркі.
«Мы хацелі стварыць месца не для спаборніцтваў, а для катанняў у задавальненне, каб праcякнуцца хараством студзеньскай прыроды і атрымаць асалоду ад моманту. Траса будзе даступная як для жыхароў «Зялёнай гавані», так і для мінчукоў і гасцей з іншых населеных пунктаў. Мы запрашаем усіх заглыбіцца ў гэту казачную атмасферу. А пасля катанняў можна прайсціся ўздоўж «Зялёнай гавані», дзе яшчэ можна заспець навагодні дэкор, зрабіць фатаграфіі і паназіраць за птушкамі ў заказніку Сціклева», — адзначаюць у «А-100 Дэвелапмент».
Траса будзе працаваць без выхадных днём з 10:00 да 17:00. Адзінае, што трэба прыехаць або прыйсці са сваімі лыжамі. Перад выхадам на трасу спатрэбіцца падысці да адміністратара гольф-акадэміі, прайсці інструктаж па тэхніцы бяспекі і распісацца за яго праходжанне. Усё гэта бясплатна.
Для наведвальнікаў дзейнічае бясплатная паркоўка каля гольф-акадэміі. Тыя, хто не за рулём, могуць дабрацца да «Зялёнай гавані» на маршрутцы № 1222 ад станцыі метро «Усход» або «Магілёўская».
Пасля арганізатары прапануюць прайсціся па студзеньскай «Зялёнай гавані». Комплекс да святаў аформілі ў скандынаўскім стылі: на цэнтральнай плошчы сустракае скандынаўскі конік Dala на фоне пушыстых елак, за дамамі хаваюцца «снегіры», а ўвечары эфектна свецяцца фігуры жыхароў лесу.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты8
Каментары