Удзельнікі гістарычнай экскурсіі, прысьвечанай 90‑годзьдзю абвяшчэньня БНР, пакараныя судом Навабеліцкага раёну Гомеля за парушэньне парадку правядзеньня масавых мерапрыемстваў. Прызналі вінаватай і тутэйшую журналістку — за чырвонае паліто і белыя шарыкі.
23 сакавіка прыкладна дваццаць чалавек з чырвонымі і белымі паветранымі шарыкамі прайшлі па месцах, зьвязаных з дзейнасьцю міністра БНР Палуты Бадуновай. На 9 удзельнікаў экскурсіі супрацоўнікі Навабеліцкага РУУС склалі пратаколы.
22 красавіка судзьдзя Алег Харошка аштрафаваў члена БНФ Івана Адаменку на 20 базавых велічынь (700 тыс. рублёў), члена Беларускай асацыяцыі журналістаў Тацяну Бублікаву і члена БСДП (Грамада) Дзьмітрыя Кутасава — на 15 базавых велічынь (525 тыс. рублёў). Член АГП Аляксандр Працко і актывіст аргкамітэта па стварэньні партыі «Беларуская хрысьціянская дэмакратыя» Сьвятаслаў Шапавалаў пакараны 7 і 10 суткамі арышту. Усе яны прызнаны вінаватымі ва ўдзеле ў складзе арганізаванай групы грамадзян у вулічным шэсьці і правядзеньні пікету з мэтай прыцягненьня грамадзян да сваіх грамадзка‑палітычных поглядаў. У якасьці доказу ў судзе дэманстраваўся відэазапіс мерапрыемства, які праводзілі супрацоўнікі міліцыі.
Журналістка Тацяна Бублікава на судзе заявіла, што мела рэдакцыйнае заданьне газеты «Товарищ» падрыхтаваць матэрыял аб экскурсіі. У пацьверджаньне гэтага да матэрыялаў справы быў прыкладзены факс з рэдакцыі. Аднак, на думку судзьдзі, журналістка не «прысутнічала, а брала ўдзел» у мерапрыемстве. Паводле слоў А.Харошкі, удзел у шэсьці праяўляўся ў тым, што дзяўчына прыцягвала ўвагу грамадзян да сваіх грамадзка‑палітычных поглядаў: да яе сумачкі былі прывязаны паветраныя шары. Журналістка заўважыла, што два шарыкі на сумачцы былі белага колеру. «Але паліто на вас было чырвонае», — парыраваў судзьдзя.
23 красавіка ў судзе Навабеліцкага раёна будуць працягвацца слуханьні ў дачыненьні да ўдзельнікаў гістарычнай экскурсіі.
Цяпер чытаюць
«Лукашэнка на мінімалках». «Беларускі каханак усяе Русі» стаў кумірам жаночага тыктока1
«Лукашэнка на мінімалках». «Беларускі каханак усяе Русі» стаў кумірам жаночага тыктока
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары