Прынятыя ў Беларусі сістэмныя меры ў сферы процідзеяння распаўсюджванню наркотыкаў дазволілі пераламаць сітуацыю на найбольш пагрозлівых напрамках, аднак падставы для насцярожанасці захоўваюцца. Пра гэта Аляксандр Лукашэнка заявіў сёння на нарадзе на тэму процідзеяння незаконнаму абароту наркотыкаў.
«У нашай краіне, як ні ў якой іншай дзяржаве, створана дакладная сістэма, якая вызначае не толькі галоўнае ведамства, але і паўнамоцтвы ўсіх адказных дзяржаўных органаў i iншых арганiзацый на гэтым напрамку. Настойлівасць і сістэмныя рашэнні ў сферы процідзеяння распаўсюду наркотыкаў сапраўды дазволілі пераламаць сітуацыю на найбольш пагрозлівых напрамках. Гэта выбіла ў наркадзяльцоў глебу з-пад ног у пытаннях вырабу зелля, у прыватнасці з насення маку. Пастаўлены заслон распаўсюджванню спайсаў, што выратавала не адно маладое жыццё», — сказаў Аляксандр Лукашэнка.
Разам з тым, падкрэсліў кіраўнік краіны, супакойвацца пакуль рана. Беларусь не ізаляваная ад астатняга свету, і наркапагроза застаецца. Неабходна прааналізаваць сітуацыю і вызначыць, якія дадатковыя рашэнні патрэбныя ў сувязі з гэтай праблемай.
«Мы заўсёды ганарымся тым, што наша краіна транзітная, мы атрымліваем ад гэтага пэўныя выгады. Але ў той жа час ёсць велізарны негатыў, і ён, на жаль, павялічваецца, асабліва ў сувязі з падзеямі ў Украіне», — адзначыў кіраўнік дзяржавы.
Аляксандр Лукашэнка пры гэтым канстатаваў, што больш за ўсё наркотыкаў у Беларусь паступае з тэрыторыі Расіі. «Мы гэта не проста фіксуем, а канфіскоўваем адпаведнае зелле ў наркаманаў і выразна разумеем, адкуль усё гэта», — сказаў ён.
Распаўсюджванне наркотыкаў — гэта бяда не толькі для канкрэтнага чалавека або сям'і, але і для грамадства ў цэлым, падкрэсліў кіраўнік дзяржавы. Так, за два гады ад перадазіровак ў Беларусі памерлі 80 чалавек. «На жаль, паміраюць людзі не проста працаздольнага ўзросту, а моладзь, асабліва ад так званых спайсаў», — адзначыў ён.
Аляксандр Лукашэнка нагадаў, што пры падрыхтоўцы дэкрэту №6 «Аб неадкладных мерах па супрацьдзеянні незаконнаму абароту наркотыкаў» ён даручаў стварыць у месцах пазбаўлення волі найбольш жорсткія ўмовы для вінаватых у нарказлачынстваў. Адпаведная работа праведзена, і на нарадзе мяркуецца абмеркаваць яе вынікі.
Цяпер чытаюць
Былы міністр культуры Руслан Чарнецкі знайшоў сабе падпрацоўку9
Каментары