Падчас пажару ў алжырскім дзіцячым доме загінулі больш за дзесяць чалавек
У ноч на 16 ліпеня ў дзіцячым доме, размешчаным у камуне Махамедыя на ўсходзе сталіцы Алжыра, адбыўся моцны пажар. Паводле апошніх даных службы грамадзянскай абароны краіны, у выніку трагедыі загінулі не менш за 11 чалавек, яшчэ 19 атрымалі раненні. Узрост загінулых пакуль не паведамляецца, піша Euronews.
Першыя падраздзяленні ратавальнікаў прыбылі на месца здарэння каля трэцяй гадзіны ночы. Для ліквідацыі пажару былі задзейнічаныя шэсць пажарных аўтамабіляў, шэсць машын хуткай дапамогі, а таксама спецыяльнае падраздзяленне для працы ў цяжкадаступных месцах, абсталяванае аўтадрабінай.
Спачатку паведамлялася пра 16 пацярпелых, якія атрымалі апёкі, атручванне прадуктамі гарэння і цяжкасці з дыханнем. Пазней інфармацыя была ўдакладненая: колькасць загінулых павялічылася да 11 чалавек, а пацярпелых — да 19. Не выключаецца, што колькасць ахвяр можа яшчэ больш павялічыцца.
Паводле апошніх звестак, дзесяць чалавек атрымалі апёкі рознай ступені цяжкасці, двое пацярпелі ад праблем з дыханнем, яшчэ сямёра знаходзяцца ў стане псіхалагічнай траўмы пасля перажытага.
Ратавальнікі таксама эвакуявалі пяць чалавек з інваліднасцю і даставілі іх у бяспечнае месца.
Прэм'ер-міністр Алжыра Сіфі Грыб наведаў пацярпелых у спецыялізаваным апёкавым цэнтры ў Зеральдзе, а затым пабываў ва ўніверсітэцкай бальніцы Мустафа Паша, дзе таксама знаходзяцца пацярпелыя.
У апошнія дні Алжыр пакутуе ад анамальнай спёкі. На гэтым фоне толькі за адзін тыдзень у розных рэгіёнах краіны ўзнікла каля тысячы пажараў. Прычыны ўзгарання ў дзіцячым доме пакуль высвятляюцца.
Цяпер чытаюць
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары