Касманаўт Аляксей Лявонаў распавёў тэлеканалу «Звезда» сваю версію гібелі Юрыя Гагарына. Пра гэта паведамляецца на сайце канала.
27 сакавіка 1968 года, у дзень гібелі Гагарына, Лявонаў знаходзіўся на аэрадроме Кіржач Уладзімірскай вобласці, адкуль першы ў свеце касманаўт вылецеў на самалёце МіГ-15УТІ.
Праз некаторы час з аэрадрома пачулі выбух. «Мы стаялі каля КДП [камандна-дыспетчарскага пункта] і пачулі двайны выбух і звышгук. Інтэрвал паміж выбухам і звышгукам быў паўтары-дзве секунды», — распавёў касманаўт. Лявонаў і прысутныя пры гэтым іншыя лётчыкі адразу вырашылі, што крыніца звышгуку — адзін аб'ект, а выбух — іншы.
У афіцыйным заключэнні прычынай крушэння МіГ-15 назвалі збліжэнне і рэзкае ўхіленне ад іншага самалёта, аднак сапраўдным вінаватым Лявонаў лічыць той невядомы самалёт. «Адназначнай прычынай гібелі стаў лётчык, які апусціўся ніжэй за 400 метраў пад аблокі, уключыў фарсаж і прайшоў побач, не пабачыўшы Гагарына. Гэта быў самалёт Су-15, ён прайшоў на адлегласці 10-15 метраў на хуткасці гуку, узбураным патокам перакуліў самалёт Гагарына», — заявіў касманаўт.
Лявонаў таксама згадваў ліст, напісаны ўдзельнікамі расследавання. У ім была просьба не афішаваць абставіны трагедыі, каб не падвяргаць рэпрэсіям лётчыка Су-15, падначаленага Андрэя Тупалева.
Афіцыйныя высновы камісіі, якая расследавала гэта здарэнне, былі такія: экіпаж (Гагарын і лётчык-інструктар Уладзімір Сярогін) з-за змененай паветранай абстаноўкі (падрабязнасці не ўдакладняліся) здзейсніў рэзкі манеўр і сарваўся ў штопар. Нягледзячы на спробы лётчыкаў вывесці машыну ў гарызантальны палёт, самалёт сутыкнуўся з зямлёй, экіпаж загінуў. Адсутнасць выразнай апублікаванай афіцыйнай версіі і аб'ектыўных доказаў спарадзіла мноства здагадак і неафіцыйных версій гібелі лётчыкаў.
Цяпер чытаюць
Лукашэнка: Пры цяперашнім цячэнні вайны Беларусь з Расіяй не змаглі б абараніць беларускай мяжы ад Украіны20
Каментары