El Pais: Чавэс і Беларусь мелі ўзбройваць FARC
Згодна з інфармацыяй гішпанскай газэты, вэнэсуэльскі прэзыдэнт Уга Чавэс спрабаваў узброіць калюмбійскіх паўстанцаў з дапамогай Беларусі. Гэтыя меркаваньні заснаваныя на дакумэнтах, знойдзеных у кампутары забітага FARCаўскага лідэра.
Вэнэсуэльскі прэзыдэнт Уга Чавэс, як мяркуецца, спрабаваў узброіць калюмбійскіх паўстанцаў з дапамогай Беларусі, – паведаміла ў суботу газэта El Pais, цытуючы дакуманты з кампутара забітага паўстанцкага лідэра.
Гішпанская газэта цытуе е-мэйл Івана Маркеса, лідэра Рэвалюцыйных узброеных сілаў Калюмбіі (FARC), датаваны 8 лютага, у якім гаворыцца, што Чавэс разглядаў зь беларускімі ўладамі магчымасьць прадстаўленьня зброі FARC.
Мяркуецца, што е-мэйл быў знойдзены ў здабытым кампутары намесьніка камандуючага FARC Рауля Рэеса, які быў забіты ў сакавіку, – піша El Pais.
У часткова закадаваным пасланьні ўзгадваўся нехта азначаны толькі як «беларускі сябар».
Газэта цытуе часткова закадаваны ліст, датаваны 8 лютага: «Беларускі сябар прапанаваў рэалізаваць пакет на чорным рынку, каб пазьбегчы праблемаў. 17-га гэтага месяца у Каракас прыедзе высокі прадстаўнік гэтага сябра, каб удакладніць сьпіс. Анёл папрасіў нас прысутнічаць, каб мы асабіста сустрэліся з дэлегатам. Гэта вельмі важна».
«Анёла» газэта расшыфроўвае як Чавэса. «Прадстаўніком сябра» жа лічыць Віктара Шэймана. «Шэйман быў адным з тых, хто прабіваў падпісаныя летась кантракты на пастаўку зброі ў Вэнэсуэлу на 720 млн эўра», — піша газэта.
Нагадаем, што 15—19 лютага адбыўся афіцыйны візыт у Вэнэсуэлу беларускай дэлегацыі на чале зь дзяржаўным сакратаром Рады бясьпекі Віктарам Шэйманам.
El Pais дадала, што ў кампутарных пасланьнях узгадваліся іншыя магчымыя крыніцы паставак зброі (у прыватнасьці, ракетаў зямля-паветра) для FARC.
El Pais — гэта левацэнтрысцкае выданьне, самае ўплывовае ў Гішпаніі. У сьнежні газэта пісала, што Вэнэсуэла зрабілася прытулкам для FARC і што паўстанцкія лягеры зьмяшчаюцца на яе тэрыторыі. Вэнэсуэла адмаўляе гэта.
The Wall Street Journal паведаміў у пятніцу, што афіцыйныя асобы ў выведцы ЗША пэўныя ў сапраўднасьці здабытых кампутарных файлаў, якія паказваюць цесныя повязі паміж Чавэсам і калюмбійскімі паўстанцамі.
У файлах апісваюцца сустрэчы паміж паўстанцкімі камандзірамі й высокапастаўленымі асобамі з Вэнэсуэлы, у тым ліку самім Чавэсам, – паведамляе газэта, у распараджэньне якой трапілі больш за 100 дакумэнтаў з кампутара Рэеса.
ФАРК вядзе партызанку ўжо 40 гадоў. Напачатку за ФАРК стаяла баявое крыло Кампартыі, але з часам, калі стала відавочна, што ФАРК скацілася да наркагандлю і бандытызму, камуністы разарвалі з ФАРК.
Прэзыдэнты Вэнэсуэлы і Эквадору, што прыйшлі да ўлады на хвалі антыамэрыканскага папулізму, здаўна ненавідзяць прэзыдэнта Калюмбіі — вернага саюзьніка ЗША, які абапіраецца на дапамогу Вашынгтону ў барацьбе супраць наркамафіі і партызанкі.
Вайна ў Калюмбіі спрыяе росту цэнаў на нафту ў сьвеце.
Вэнэсуэла настойвае, што файлы, здабытыя Калюмбіяй пасьля таго, як яна атакавала паўстанцкі лягер у Эквадоры, фальшывыя.
«Мы не прызнаём сапраўднасьці аніводнага з гэтых дакумэнтаў, – заявіў у інтэрвію The Wall Street Journal вэнэсуэльскі пасол у Злучаных Штатах Бэрнарда Альварэс. — Яны фальшывыя, і зьяўляюцца спробай дыскрэдытаваць вэнэсуэльскі ўрад».
Віктар Шэйман неаднакроць наведваў Вэнэсуэлы летась. Афіцыйна, ён адказвае за супольныя беларуска-вэнэсуэльскія праекты ў нафтаздабычы і будаўніцтве. Адкрытае беларуска-вэнэсуэльскае вайскова-тэхнічнае супрацоўніцтва мае абмежаваны характар.
Дзяржаўны сакратарыят бясьпекі назваў публікацыю ў «El Pais» «домысламі», паведамляе БелаПАН. Прадстаўнікі Рады бясьпекі спаслаліся на папярэджаньні Чавэса, які казаў, што Злучаныя Штаты арганізуюць укіданьне ў СМІ такога кампрамату, каб дыскрэдытаваць кіраўніцтва Вэнэсуэлы.
Цяпер чытаюць
Лукашэнка: Пры цяперашнім цячэнні вайны Беларусь з Расіяй не змаглі б абараніць беларускай мяжы ад Украіны20
Каментары