Прыйшло лета. Усе пацягнуліся на прыроду, на прыгожыя беларускія азёры, у лясную цішу… Але адпачынак можа абярнуцца трагедыяй. Калі пра небяспекі экзатычных краін усе вандроўнікі імкнуцца даведацца загадзя, то свая беларуская тэрыторыя ў свядомасці людзей выглядае прыязнай. Але гэта не заўсёды так.
Клімат у нас умераны, таму атрутныя расліны на кожным кроку не трапляюцца. Але гэта не значыць, што іх няма. Паводле ацэнак навукоўцаў, толькі ў Мінскай вобласці зарэгістравана 36 відаў атрутных раслін.
Адна з найбольш небяспечных раслін — цыкута
Яна ж — віхаг шалей (рас. вех ядовитый, кошачья петрушка, вяха, омег, омежник, водяная бешеница, водяной болиголов, мутник, собачий дягиль). Яна распаўсюджаная на тэрыторыі ўсёй Беларусі. У 2013 годзе цыкута была заўважаная на Блакітных азёрах у Мядзельскім раёне, калі ад атручвання ёю проста на месцы за 40 хвілін памёр байдарачнік Міхаіл Шарамет.
Расліна выглядае бяскрыўдна і яе лёгка зблытаць са звычайнымі травамі. Усе прадстаўнікі сямейства парасонавых для неадмыслоўца выглядаюць аднолькава — што кроп, што кмен, што баршчэўнік, што цыкута. Але ў тым і падступства: ні выгляд, ні смак, ні пах нічым не выдаюць смяротную пагрозу. У цыкуты прыемны маркоўны пах, смачнае карэнішча, якое нагадвае бручку або рэдзьку і нагадвае вадзяны тапінамбур.
Дзеянне гэтай расліны пачынаецца праз некалькі хвілін: яе яд выклікае млоснасць, ваніты і колікі ў ніжняй частцы жывата, хісткую хаду, пену з рота, а прыпадкі і курчы могуць скончыцца паралічам і смерцю.
Расце цыкута ў балоце, брудзе, цяжкадаступных і гразкіх месцах. Здавалася б, яна сама хаваецца ад вачэй. Але знайсці яе ўсё роўна можна. І гэтая знаходка можа стаць апошняй. Бо чалавек можа загінуць толькі ад аднаго дотыку да расліны. Дастаткова пасля гэтага не памыць рукі перад ежай, каб памерці ў пакутах.
Сімптомы атручвання
Яд цыкуты дзейнічае на цэнтральную нервовую сістэму. Для смяротнага зыходу дастаткова, каб на скуру патрапіла трохі яе соку. Да сімптомаў атручвання, якія выяўляюцца адразу на месцы, адносяць горыч у роце, боль у жываце, перарывістае дыханне.
Калі раптам такое адбываецца, трэба адразу ж на месцы любымі сродкамі выклікаць ваніты. Пасля чаго пастарацца трапіць у бальніцу для прамывання страўніка. Калі раптам на прыродзе ў вас або ў дзіцяці закружылася галава, з'явіліся панос або ваніты, трэба неадкладна выклікаць хуткую дапамогу.
Калі не есці грыбы ў лесе дзеці яшчэ сяк-так бываюць прывучаныя, то на расліны, і, тым больш, на «кветачкі», такое правіла звычайна не распаўсюджваецца. Таму лепш у лесе і на азёрах наогул нічога не выкопваць з зямлі і не есці і траву ў рот не браць. І на незнаёмай тэрыторыі не спускаць з дзяцей вачэй.
Каментары