Расклад выступаў беларусаў на Алімпіядзе ў Рыа на сёння, 6 жніўня
У другі дзень Алімпіяды-2016 беларусы стартуюць у пяці відах спорту. 6 жніўня будуць разыграны 12 камплектаў узнагарод, аднак нашы суайчыннікі (усе, акрамя веласіпедыстаў) будуць выступаць у папярэдніх раўндах — у гэтых відах барацьба за медалі пойдзе пазней.
6 жніўня, пройдуць папярэднія заезды ў акадэмічным веславанні. Жывая трансляцыя запланаваная на тэлеканале «Беларусь 5» (наступныя трансляцыі таксама на гэтым тэлеканале), пачатак у 14.30.
У 16.30 можна будзе пабачыць старт беларусаў у спартыўнай гімнастыцы (будзем заўзець за Андрэя Ліхавіцкага), веласпорце (выступяць Васіль Кірыенка і Канстанцін Сіўцоў, трансляцыя велагонак працягнецца ў 21.30), працягнуцца папярэднія заезды ў акадэмічным веславанні.
У 20.30 пакажуць настольны тэніс, Аляксандра Прывалава згуляе з Недай Шахсавары з Ірана. У 21.45 Вікторыя Паўловіч сустрэнецца з кімсьці з тых, хто пройдзе з папярэдняга раўнда.
У ноч з суботы на нядзелю свой першы матч правядзе жаночая баскетбольная зборная Беларусі. Яна сустрэнецца з камандай Японіі. Жывая трансляцыя запланаваная на тэлеканале «Беларусь 5», пачатак у 01.40.
Каментары