Будуць куплеты і прыпевы.
26 чэрвеня адбудзецца рэліз CD-вэрсіі сольнага альбому Лявона Вольскага «Куплеты і прыпевы». У гэты ж дзень у 18 гадзін пройдзе прымеркаваная да гэтага аўтограф-сэсія, а таксама эксклюзіўны міні-канцэрт у дыскарні «Містэрыя гуку» (ГЦ «Рыга», вул.Сурганава, 50).
«Куплеты і прыпевы» будуць выдадзеныя на CD з шматлікімі бонусамі. Апрача арыгінальных 10 песень, выкладзеных у красавіку ў інтэрнэце, аўдыёчастка будзе змяшчаць караоке-версіі ўсіх песень, а мультымедыйная частка — трэш-відэа «Эўравізія» ад Яўгена Новаша.
Акрамя таго, дыск будзе мець сапраўды зьмястоўны буклет. У ім — тэксты і акорды да альбому, а таксама эксклюзіўны слоўнік, дзе Лявон Вольскі тлумачыць розныя словы і тэрміны, выкарыстаныя ў тэкстах. Сярод іх, «бадунец», «коркі», «цёркі» і шмат інш.
«Можна сказаць, што CD-выданьне фактычна зьдзейсьнена «па замовах слухачоў», — кажа Лявон Вольскі. — Мы не зьбіраліся яго рабіць, але шмат хто хацеў набыць дыск нават пасьля таго, як спампаваў яго ў інтэрнэце. У выніку атрымалася нятаннае калекцыйнае выданьне, але мне здаецца гэта нармальна, улічваючы тое, што сайт зачыняць мы ня будзем».
Не менш эксклюзіўным павінен стацца міні-канцэрт Лявона Вольскага, які адбудзецца ў дзень рэлізу ў дыскарні «Містэрыя гуку» (ГЦ «Рыга»). Гэта будзе першае і можа адзінае жывое выкананне песень з альбому «Куплеты і прыпевы», таму што больш ніякіх канцэртных выступаў з гэтай праграмай сьпявак не плянуе. Між іншым, з красавіка «Куплеты і прыпевы» спампавалі больш за шэсьць тысяч інтэрнэт-карыстальнікаў.
Каментары