У каталіцкай царкве з'явілася сем новых святых. Гэта вядомыя сваімі добрымі справамі і цудамі заступніцтва святары і парафіяне з шасці краін.
Папа Рымскі Францішак здзейсніў у нядзелю, 16 кастрычніка, абрад кананізацыі, абвясціўшы святымі каталіцкай царквы сем благаслаўлёных — двух пакутнікаў, трох заснавальнікаў манаскіх ордэнаў, аднаго простага святара і адну манашку. Цырымонія адбылася на плошчы перад саборам святога Пятра ў Ватыкане.
Святымі сталі француз Саламон Леклерк (1745 — 1792) і мексіканец Хасэ Санчэс Дэль-Рыа (1913 — 1928), якія сталі ахвярамі рэвалюцый у сваіх краінах.
Сярод трох заснавальнікаў манаскіх ордэнаў найбольш вядомым з'яўляецца італьянец Людовік Павоня (1784 — 1849), які заснаваў ў 1847 годзе «Кангрэгацыю Сыноў Марыі Беззаганна Зачатай» — манаскі ордэн, які дапамагаў бедным і беспрацоўным маладым людзям.
Абвешчаны святым італьянец Альфонс Марыа Фуск (1839 — 1910) заснаваў жаночы манаскі ордэн, які дапамагаў бедным сялянам. Іспанскі біскуп Мануэль Гансалес Гарсія (1877 — 1940) заснаваў дзве манаскія кангрэгацыі.
Да ліку святых пантыфік прылічыў таксама простага аргентынскага святара Хасэ Габрыэля дэль Расарыя Брачэра (1840 — 1914), які прысвяціў жыццё дапамозе бедным і хворым, і сястру Элізабэту ад Найсвяцейшай Тройцы з Ордэну Кармэлітанак Босых (1880 — 1906).
Абвяшчэнне святым у каталіцтве з'яўляецца другой стадыяй праслаўлення, якая ідзе пасля беатыфікацыі (прылічэння да ліку блаславёных).
У асобнай заяве 13 кастрычніка Ватыкан паведаміў, што Кангрэгацыя кананізацыі святых з адабрэння Папы Францішка выдала дэкрэты, якія сведчаць аб «гераічных дабрадзейных справах» чатырох чалавек, якія цяпер атрымаюць права на беатыфікацыю, калі які-небудзь цуд будзе прыпісаны іх заступніцтву. Гэта два іспанскіх святара, а таксама манах і манахіня з Італіі.
Браты-блізняты прыйшлі працаваць у міліцыю. Адзін з іх пераплыў раку і ўцёк з Беларусі, каб не займацца палітычнымі справамі. Пагутарылі з ім1
Каментары