Здарэнне адбылося раніцай у вёсцы Зазерка. У гэты час на прыпыначным пункце было шмат людзей - дзеці чакалі электрычку, каб з'ехаць у школу, дарослыя — на працу.
— Недзе ў 7.37 у нас ідзе электрычка эканом-класа, а прыкладна ў 7.25 праходзіць «Штадлер», — распавядае Алег, відавочца здарэння. — Жанчына, відаць, пераблытала цягнікі. Купіўшы білет, яна перабягала па рэйках на іншы бок перона. Туды, дзе павінна была спыніцца электрычка. У гэты час яе і збіў «Штадлер».
Мужчына кажа, што загінулая — пажылая жанчына
— Такія здарэнні ў нас здараюцца не першы раз, але часцей з п'янымі, — працягвае Алег. - А тут … жанчына, мабыць, моцна спяшалася.
Па словах відавочцы, «Штадлер» ідзе ў бок Пухавічаў і дзесьці за кіламетр пачынае сігналіць.
— Хуткасць саставу прыкладна 140 км/г, ён не паспеў своечасова спыніцца, толькі пасля аварыі машыніст ужыў экстранае тармажэнне, — распавядае Алег.
Цяпер на месцы здарэння працуе следча-аператыўная група.
- Асоба жанчыны ўстаноўлена, - удакладніў Яўген Сачак, афіцыйны прадстаўнік УУС Мінскай вобласці. — Гэта мясцовая жыхарка 1944 года нараджэння.
Каментары