Трамп прапанаваў сусветным лідарам тэлефанаваць яму на мабільны
Прэзідэнт ЗША Дональд Трамп даў нумар свайго мабільнага тэлефона кіраўнікам шэрагу замежных дзяржаў і сказаў тэлефанаваць яму наўпрост, чым парушыў дыпламатычны пратакол і выклікаў хваляванне службы бяспекі. Пра гэта паведамляе The Washington Post са спасылкай на былых і цяперашніх амерыканскіх службовых асобаў.
Нумар мабільнага тэлефона Трампа атрымалі прэзідэнт Мэксыкі і прэм’ер-міністр Канады, прычым другі ўжо скарыстаўся ім. Трамп таксама абмяняўся нумарамі мабільных тэлефонаў з прэзідэнтам Францыі Эманюэлем Макронам, паведаміў газеце французскі прадстаўнік.
Якім бы мабільным тэлефонам ні карыстаўся прэзідэнт за межамі надзейна абароненых памяшканняў, размовы па ім могуць быць перахопленыя любымі кампетэнтнымі спецслужбамі, дружалюбнымі і не, паведамілі выданню крыніцы.
У ходзе выбарчай кампаніі мінулага года Трамп крытыкаваў сваю суперніцу ад Дэмакратычнай партыі Хілары Клінтан за перасылку службовых дакументаў з дапамогай неабароненай электроннай пошты.
Цяпер чытаюць
Квадрат у Мінску каштуе рэкордна дорага: нарэшце пабіты рэкорд 2007 года2
Каментары