22-гадовы расійскі кантрактнік Віктар Агееў 24 чэрвеня быў узяты ў палон украінскімі вайскоўцамі ў Луганскай вобласці Украіны.
Агееў, як вынікае з публікацыі, уваходзіў у разведгрупу ўзброеных фармаваньняў самаабвешчанай Луганскай народнай рэспублікі (кіраваў групай, па сцвярджэнні украінскіх вайскоўцаў, «кадравы рускі афіцэр капітан Аляксандр Шчарбак»), і быў затрыманы ў выніку яе сутыкнення з украінскімі вайскоўцамі ў раёне сяла Жалабок Славянасербскага раёна.
Гэтую інфармацыю «Бі-бі-сі» пацвердзілі крыніцы ў Мінабароны Украіны і камандаванні ўкраінскай 93-й асобнай механізаванай брыгады.
Маці расіяніна Святлана Агеева пазнала дакументы свайго сына на фотаздымках, якія падалі «Бі-бі-сі» крыніцы. Фатаграфіі пашпарта і ваеннага білета Агеева таксама апублікавалі ўкраінскія журналісты.
Агееў, як распавялі яго былыя калегі, у 2015—2016 гадах праходзіў тэрміновую службу ў Новачаркаску Растоўскай вобласці ў палку сувязі. Пасля звальнення, па словах аднаго з іх, ён «пайшоў служыць на кантракт у вайсковую разведку».
Па словах Святланы Агеевай, ён падпісаў кантракт 18 сакавіка 2017 году; новым месцам службы стаў Батайск Растоўскай вобласці. Там раскватараваная 22-я асобная гвардзейская брыгада спецыяльнага прызначэння ГРУ.
Як высветлілі журналісты, у асабістай перапісцы з адным з былых таварышаў па службе Агееў прама сказаў, што знаходзіцца ва Украіне, пацвердзіўшы, што ён «кантрактнік» і яму «плацяць дастаткова». Святлана Агеева расказала, што яе сын аб магчымым выкананні баявых задач на тэрыторыі Украіны казаў «завуалявана».
Каментары