Кіраўнік урада Каталоніі, якая абвесціла незалежнасць насуперак забароне іспанскага кіраўніцтва, здаўся паліцыі Бельгіі. Пра гэта паведамляе каталонскі партал Ara.
8 міністраў урада Каталоніі і кіраўніцтва найбольшых незалежніцкіх НДА краіны былі арыштаваныя іспанскімі ўладамі. Кіраўнік жэнэралітэта (урада) Карлес Пучдэмон і яшчэ 4 міністры паспелі выехаць з краіны да затрыманняў.
Яны накіраваліся ў Бельгію, каб там лабіраваць справу незалежнасці перад еўраструктурамі. Апроч таго, яны маглі разлічваць на палітычны прытулак у гэтай краіне.
Бельгія — адзіная з краін Еўрасаюза, якая надае прыстанішча выхадцам з іншых краін ЕС, калі тыя дакажуць факт палітычнага пераследу. Гэта таксама краіна, дзе каталонцы карыстаюцца вялікай сімпатыяй з боку фламандскага насельніцтва, якое само хоча вылучэння ў асобную дзяржаву.
У нядзелю Пучдэмон і ягоныя міністры здаліся бельгійскай паліцыі. Іх лёс будзе вырашаць суд у панядзелак.
Тым часам апытанні грамадскай думкі ў Каталоніі паказалі, што хаўрус незалежніцкіх партый правага і левага кірункаў ізноў здабудзе большасць на выбарах у самакіраванне, абвешчаных пасля роспуску дзейнага парламента і ўрада аўтаноміі Мадрыдам.
Як выявілі сацыёлагі, кааліцыю Пучдэмона падтрымлівае прыкладна 46% выбарцаў. У яе ўваходзяць ліберальна-кансерватыўная Дэмакратычная партыя Каталоніі самога Пучдэмона, Рэспубліканская левая партыя на чале з намеснікам Пучдэмона, які знаходзіцца ў ліку арыштаваных, а таксама радыкальная лявіца.
За тры праіспанскія партыі гатовыя прагаласаваць 43%. У іх лік уваходзяць Народная партыя дзейнага прэм'ера Іспаніі Рахоя, Сацыялістычная партыя, ліберальныя «Грамадзяне».
Можна меркаваць, што пасля выбараў Каталонія працягне курс на аддзяленне ад Іспаніі, нягледзячы на рэпрэсіі Мадрыда і халоднае стаўленне Еўрасаюза і ЗША.
54-гадовы Карлес Пучдэмон — журналіст, які пайшоў у палітыку. Ён вырас у сям'і патомных пекараў, у якой ўсяго было 8 дзяцей. Дзед Пучдэмона, у гонар якога атрымаў сваё імя Карлес, удзельнічаў у вайне супраць франкістаў і загінуў на эміграцыі. Сам Пучдэмон скончыў факультэт каталонскай філалогіі. У прэсу стаў пісаць з 16 гадоў, пачаўшы са спартовых рэпартажаў. У прафесійную палітыку ён перайшоў ад 2011 года. Стаў першым кіраўніком Каталоніі, які адмовіўся прысягаць каралю Іспаніі.
Цікава, што Пучдэмон жанаты з румынкай і вянчаўся з ёй па праваслаўным абрадзе.
Пучдэмон мае 560 тысяч падпісчыкаў у Твітары. Сваё апошняе паведамленне ў ім перад здачай паліцыі ён пакінуў па-фламандску:
We zijn bereid tot volledige medewerking met Belgische justitie nav het Europees aanhoudingsbevel uitgevaardigd door Spanje
— Carles Puigdemont (@KRLS) November 4, 2017
Цяпер чытаюць
Пяць пытанняў, якія застаюцца пасля смерці экс-выкладчыка БНТУ Шчукіна, што ўцякаў ад міліцыі35
Каментары