Паводле выраку, усе аўтарскія правы на стужкі Дабралюбава належаць "Беларусьфільму" і рэжысэр ня будзе атрымліваць ніякіх узнагародаў за пракат і продаж фільмаў.
Сёньня быў абвешчаны прысуд па позьве рэжысёра Ігара Дабралюбава, які зьвярнуўся ў Вярхоўны Суд, каб скасаваць дамову з кінастудыяй. Дабралюбаў з 1964 году па 1995 год зьняў на студыі 13 ігравых стужак. У 2002 годзе кінастудыя заключыла з рэжысэрам дамову на выкарыстаньне ягоных аўтарскіх маёмасных правоў у краіне й па-за ейнымі межамі.
Сярод найвядомейшых стужак Дабралюбава - "Іван Макаравіч" і "Белыя Росы".
Сын Дабралюбава Аляксей, які прадстаўляў у судзе свайго бацьку, сказаў, што з 2006 году ў рэжысэра зьявіліся пытаньні па сумах выплатаў, і ён патрабуе дамову скасаваць. Цяпер ягоны даход складаецца толькі з пэнсіі і зь бескарысьлівай дапамогі Фонду Мікіты Міхалкова.
У сваю чаргу “Беларусьфільм” заявіў сустрэчную позву пра “нікчэмнасьць зьдзелкі”.
Гэта ня першы такі працэс зь “Беларусьфільмам”. У 2004 годзе Аляксей Дудараў судзіўся з кінастудыяй па “Белым Росам”, але працэс прайграў. Праўда,быў і іншы прэцэдэнт: сцэнарыст Аляксандар Качан выйграў справу ў “Беларусьфільму”.
На гэты ж раз Вярхоўны Суд прыняў бок кінастудыі. Дамова была прызнаная нікчэмнай. Паводле выраку, усе аўтарскія правы на стужкі Дабралюбава належаць "Беларусьфільму" і рэжысэр ня будзе атрымліваць ніякіх узнагародаў за пракат і продаж фільмаў, - паведаміў сын творцы.
Больш за тое, 75-гадовы рэжысэр мусіць заплаціць судовыя выдаткі ў памеры 1,8 млн рублёў.
Цяпер чытаюць
Арыштаваны 75‑гадовы Зміцер Санько — ветэран-выдавец3
Каментары