Усе гадаюць, чаму Месяц змяніў сваё становішча на небе. Спыталі ў астранома, што адбываецца
Увесь Threads разважае, што здарылася з Месяцам. Прыгледзьцеся: калі раней ён быў вертыкальны, то цяпер нібыта ляжыць над гарызонтам. Мы папрасілі астрафізіка патлумачыць, што здарылася.
Карыстальнікі сацсетак абмяркоўваюць, чаму Месяц раптам змяніў сваё месцазнаходжанне на небе. Замест вертыкальнага цяпер ён нібыта гарызантальны:
«Я адна гэта бачу ці нас шмат? Месяц жа быў іншы».
«Ужо не першы раз такое бачым у Беларусі і ўсё роўна здзіўляемся, але раней таксама не памятаем, каб ён так гарызантальна ляжаў».
«Вы хочаце сказаць, што Месяц заўжды быў павернуты, як цяпер? Фота 2021 года, каго вы разводзіце? Я чакаю тлумачэнне».
Астрафізік Іван Сіўцоў патлумачыў «Нашай Ніве», што насамрэч здарылася. Сам Месяц не свеціць — мы бачым Месяц на небе, таму што яго асвятляе Сонца. Сонца, Зямля і Месяц рухаюцца ў космасе па сваіх траекторыях. І каб Месяц аказаўся «ляжачы», гэтыя аб’екты павінны былі апынуцца ў асаблівым становішчы адзін да аднаго.
Для назіральніка з Зямлі Сонца рухаецца ў небе прыкладна па коле, але пры гэтым праз нахіл зямной восі на 23,5° тое кола ў пэўных участках змяняе свой вугал адносна гарызонту. Таму Сонца ў небе не заўжды ходзіць па адной і той жа траекторыі: напрыклад, летам яно падымаецца ў небе вышэй, чым узімку.
Цяпер, у дні пасля вясновага раўнадзенства (22 сакавіка), гэтая траекторыя ў нашым паўшар’і самая крутая. На захадзе яна стаіць амаль вертыкальна да гарызонту, што і дазваляе Сонцу падсвяціць Месяц знізу.
«Месяц таксама можа трохі сыходзіць у бок, бо ён круціцца пад нахілам. І цяпер спалучылася дзве рэчы: і Месяц, і Сонца максімальна адхіліліся ад звыклых траекторый. Таму месяцовы серп памяняў становішча і зрабіўся больш ляжачым, як на экватары», — тлумачыць навуковец.
Але хутка Месяц вернецца ў сваё звыклае становішча.
«Наша Нiва» — бастыён беларушчыны
ПАДТРЫМАЦЬЦяпер чытаюць
Мужчына ў мінскім метро лапаў дзяўчат, з выгляду падлеткаў, і паказваў ім пахабныя жэсты. Яго затрымалі14
Каментары