Удзельнікам гонкі за мандаты ў мясцовых органах самакіравання дазволяць выступіць на дзяржаўных радыёстанцыях, даючы кожнаму па тры хвіліны. Але ў прамы эфір нікога не пусцяць — выступы будуць ісці ў запісе, паведамляе Tut.by са спасылкаю на Цэнтрвыбаркам.
З 22 студзеня да 12 лютага кандыдаты будуць намагацца змясціць у тры хвіліны расповед і пра сябе, і пра свае планы для рэгіёну. Запісы пойдуць у эфір з 18.00. Кандыдаты з Мінску, да прыкладу, будуць выступаць на радыё «Мінск», а з Мінскай вобласці — на радыё «Мінская хваля». У іншых рэгіёнах гэта будуць мясцовыя дзяржаўныя радыёстанцыі.
Супрацоўніца апарата Цэнтрвыбаркама Галіна Мкртычан лічыць, што гэтага часу цалкам дастаткова, каб выкласці сваю праграму — «пры пісьменным падыходзе», — зазначыла яна.
Мясцовыя выбары прызначаныя на 18 лютага будучага года.
Каментары