Ад суперкамп'ютара да ўгнаенняў: топ-10 дасягненняў беларускай навукі ў 2017 годзе

1. Пераносны суперкамп'ютар

Аўтар: Аб'яднаны інстытут праблем інфарматыкі Нацыянальнай акадэміі навук Беларусі

Калектыў навукоўцаў правёў фундаментальныя даследаванні і распрацоўку малагабарытнага мабільнага суперкамп'ютара для апрацоўкі вялікіх масіваў дадзеных і рашэння задач высокадакладнага мадэлявання і праектавання.

2. Абарона для мікраэлектронікі

Аўтар: Навукова-практычны цэнтр Нацыянальнай акадэміі навук Беларусі па матэрыялазнаўстве

Калектыў гэтага цэнтра распрацаваў і сінтэзаваў кампазіцыйныя і нанаструктурныя магнітныя матэрыялы, якія забяспечваюць высокія функцыянальныя ЗВЧ-характарыстыкі і абарону вырабаў мікраэлектронікі ад дэстабілізуючых знешніх уздзеянняў.

3. Новыя адкрыцці для атамнай энергетыкі

Аўтар: Аб'яднаны інстытут энергетычных і ядзерных даследаванняў — Сосны

Супрацоўнікі інстытута стварылі метады і праграмы разліку аптычных сячэнняў атамных ядраў з гарантаванай дакладнасцю. Іх ужываюць пры вырашэнні навуковых і інжынерных задач атамнае энергетыкі.

4. Крок да перамогі над сухотамі

Аўтар: Інстытут біяарганічнае хіміі Нацыянальнай акадэміі навук Беларусі

Навукоўцы ўсталявалі малекулярны механізм падаўлення імунітэту чалавека мікабактэрыямі Mycobacterium tuberculosis з мэтай стварэння супрацьсухотных прэпаратаў новага пакалення.

5. Індыкатар устойлівасці да акісляльнага стрэсу

Аўтар: Інстытут біяарганічнай хіміі Нацыянальнай акадэміі навук Беларусі

Выяўлены новы ўніверсальны індыкатар антыаксідантнага патэнцыялу для дыягностыкі ўстойлівасці чалавека да акісляльнага стрэсу.

Акісляльны стрэс — гэта стан, пры якім у арганізме занадта шмат свабодных радыкалаў. Разбуральнае дзеянне залішніх канцэнтрацый свабодных радыкалаў палягае ў паскарэнні працэсаў старэння арганізма, правакаванні запаленчых працэсаў у цягліцавых, злучальных і іншых тканках, няправільным функцыянаванні цыркуляцыйнае, нервовае і імуннае сістэмаў.

6. Абарона мозгу пры інсульце

Аўтар: Кандыдат біялагічных навук, дацэнт Сяргей Віктаравіч Федаровіч, старшы навуковы супрацоўнік Інстытута біяфізікі і клетачнай інжынерыі Нацыянальнай акадэміі навук Беларусі

Быў устаноўлены механізм парушэнняў сінаптычнае перадачы ў нейронах жывёл пры гіпаксіі. Карэкцыя гэтых парушэнняў дазваляе абараніць мозг ад пашкоджанняў падчас ішэмічнага інсульту.

7. Абарона раслін новага пакалення

Аўтар: Інстытут мікрабіялогіі Нацыянальнай акадэміі навук Беларусі

Аўтарскі калектыў выявіў і інактываваў гены рэгуляцыі біясінтэзу антымікробных метабалітаў у бактэрый. Гэта дазваляе істотна павысіць прадукцыю мэтавых біялагічна актыўных злучэнняў і стварыць сродкі абароны раслін новага пакалення.

8. Высокатэхналагічныя ўгнаенні

Аўтар: Інстытут глебазнаўства і аграхіміі

Навукоўцы стварылі мікробную кампазіцыю, якая спалучае ўласцівасці біяўгнаення, рэгулятара росту і біяфунгіцыду.

9. Поўны лінгвістычны даведнік беларускае мовы

Аўтар: Цэнтр даследаванняў беларускай культуры, мовы і літаратуры Нацыянальнай акадэміі навук Беларусі і Аб'яднаны інстытут праблем інфарматыкі Нацыянальнай акадэміі навук Беларусі.

Была распрацаваная метадалогія канвертавання электроннага арфаграфічнага запісу беларускіх словаў у транскрыпцыю і створаны першы поўны беларускі лінгвістычны даведнік.

10. Унікальныя палескія паселішчы

Аўтар: Інстытут гісторыі Нацыянальнай акадэміі навук Беларусі

Навукоўцы адкрылі на Палессі ўнікальныя для сусветнай гістарычнай навукі славянскія паселішчы, а таксама раскрылі працэс фарміравання і развіцця раннеславянскае супольнасці на тэрыторыі Беларусі.

Чытайце таксама: Навуковыя прарывы 2017 года: генная медыцына хутка будзе знішчаць хваробы яшчэ да нараджэння дзіцяці (самыя важныя дасягненні сусветнае навукі)

• 0
• 0
• 0
• 0
• 0
• 0
• 0
• 0