Гісторыя пра васьмімесячнае дзіця, якому сабака пракусіў галаву, выклікала вялікі рэзананс. На шчасце, у гэтым выпадку трагедыі ўдалося пазбегнуць. Хлопчыка выратавалі віцебскія дактары, правёўшы шмат у чым унікальную аперацыю. Падрабязнасці распавяла на сваіх старонках газета «Рэспубліка».
Рызыка інфекцыі, па словах нейрахірурга Ігара Ціхамірава, які апераваў дзіця, застаецца і цяпер — зубы сабакі ніяк нельга назваць стэрыльнымі, яго сліна пранікла глыбока. Таму хлопчык яшчэ некаторы час правядзе на бальнічным ложку.
— Маленькі пацыент, якога перавозілі на рэанімабілі, быў яшчэ ў дарозе, а мы ўжо поўным ходам рыхтаваліся да аперацыі. З Наваполацка нам па электроннай пошце скінулі вынікі камп'ютарнай тамаграфіі. Разам з галоўным дзіцячым нейрахірургам краіны Міхаілам Талабаевым мы загадзя абмеркавалі тактыку перавозкі пацярпелага, сам ход аперацыі. Вядома ж, усе моманты прадбачыць было складана, нешта прыйшлося карэктаваць ужо за аперацыйным сталом, — успамінае Ігар Ціхаміраў.
Немаўля прывезлі ў прытомнасць, яно было на руках у мамы. Як распавёў нейрахірург, у дзіцяці было восем праколаў зубамі сабакі з двух бакоў — цемянная вобласць, вушныя ракавіны. Адна з ран — пранікальная ў чэрап, аскепак — паўтара сантыметра. Мазгавая абалонка і сам мозг пашкоджаны. Аперацыя ішла каля дзвюх гадзін, Ігару Ціхаміраву дапамагаў нейрахірург Антон Эрдман. Маляняці правялі трэпанацыю чэрапа, прыбралі адломкі ўвагнутай косткі, усё апрацавалі. Суткі дзіця знаходзілася ў медыкаментозным сне. Потым яго вывелі са штучнай комы, на трэці дзень яно ўжо ўсміхалася.
— На тым мы з маленькім пацыентам і развіталіся — ён паспяхова адбыў у Мінск. Ці ёсць у тым, што здарылася, віна дарослых членаў сям'і? Спрачацца, вядома, можна, але тое, што ў дадзенай сітуацыі ні дзіця, ні сабака кантраляваць свае дзеянні не маглі, сумневу не падлягае. Сабака прыняў малога за канкурэнта на ласы кавалак з гаспадарскага стала, — лічыць Ігар Ціхаміраў.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд28
Каментары