У Літве зарэгістраваны грамадскі рух у абарону рэпрэсаваных у Беларусі, паведаміў БелаПАН адзін з яго заснавальнікаў прафесар Юрый Бандажэўскі.
Паводле яго слоў, заснавальнікамі руху выступілі прадстаўнікі літоўскай грамадскасці, буйныя прадпрымальнікі і юрысты.
Вучоны ўпэўнены, што такое супрацоўніцтва беларусаў і літоўцаў «дасць плён». «Мы будзем дапамагаць усім беларускім грамадзянам, хто змагаецца за свае правы. Такая дапамога вельмі важная, бо ў Беларусі няма эфектыўнага інструмента абароны правоў чалавека», — сказаў Ю.Бандажэўскі. Паводле яго слоў, у хуткім часе заснавальнікі руху ўстановяць кантакты з афіцыйнымі міжнароднымі структурамі, каб мець магчымасць эфектыўна дапамагаць тым, хто мае патрэбу ў абароне.
«Рэч у тым, што любое ўшчамленне правоў чалавека з’яўляецца рэпрэсіямі, вось чаму мы будзем аказваць любую, у тым ліку маральную, матэрыяльную і юрыдычную, дапамогу тым, хто ў ёй мае патрэбу», — сказаў ён.
Вучоны з Гомеля доктар медыцынскіх навук Юрый Бандажэўскі, аўтар даследаванняў аб уплыве малых доз радыяцыі на арганізм чалавека, шэсць гадоў правёў у турме за атрыманне хабару. Сваю віну ён не прызнаў, заявіўшы, што беларускія ўлады такім чынам расправіліся з ім за яго навуковую дзейнасць.
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?1
Каментары