Сацыяльны педагог адной са школ Мінскай вобласці паведаміў бацькам некалькіх старшакласніц, што іх дочкі кураць. Хутка аб гэтай гісторыі ўсе забыліся, але адзін з школьнікаў вырашыў правучыць педагога і «адпомсціць» за аднакласніц, хоць тыя яго аб гэтым нават і не прасілі.
Падрабязнасці гісторыі распавяла міліцыя Мінскай вобласці.
Хлопец вырашыў узламаць старонку настаўніка ў сацсетках. Але для гэтага трэба, каб ахвяра сама ўсталявала на камп’ютары адпаведную праграму.
Тады школьнік пад выглядам дзяўчыны стварыў фэйкавую старонку ў сацсетках. Каб пазбегнуць адказнасці на выпадак, калі «нешта пойдзе не так» ці ахвяра звернецца ў міліцыю, зламыснік выкарыстаў усе самыя сучасныя сістэмы ананімнасці. Затым з гэтай старонкі «пазнаёміўся» з аб'ектам шантажу.
Пасля некаторай перапіскі выявілася, што ў новых знаёмых ёсць агульныя музычныя інтарэсы. «Дзяўчына» пахвалілася, што карыстаецца праграмай-плэерам, якая вельмі якасна прайграе любую музыку, і нават пагадзілася падзяліцца спасылкай на праграму са сваім новым сябрам. Да таго ж, па яе словах, праграма падключана да вялікага бясплатнага архіву класнай музыкі, з якога лёгка спампоўваць упадабаныя кампазіцыі. Малады педагог з радасцю скарыстаўся прадстаўленай магчымасцю, але праз некаторы час адпісаўся, што плэер «ўсталяваўся, але музыку чамусьці не знаходзіць і не прайграе».
На што «дзяўчына» здзівілася і выказала здагадку, што ў яго няправільныя сеткавыя настройкі і скінула яму «правільныя» і нават падказала, як іх замяніць. Настаўнік зрабіў усё па інструкцыі «знаёмай», і школьнік атрымаў доступ да яго старонкі. З таго ж «дзявочага» акаунта ён пачаў пагражаць, што апублікуе прыватныя перапіскі настаўніка, калі той не выбачыцца перад школьніцамі.
Але педагог пайшоў у міліцыю. І «дзяўчыну» хутка знайшлі.
Цяпер на вучня завялі крымінальную справу. Яму пагражае да 2 гадоў пазбаўлення волі.
Каментары