Зрабіць ЭКА за кошт дзяржавы можна будзе толькі ў адным медцэнтры. А другую бясплатную спробу дадуць не ўсім
Распавядаем, што змянілася для беларусак, якія плануюць скарыстацца магчымасцю зрабіць ЭКА бясплатна.
Ад сёння набывае моц указ №100 «Аб правядзенні экстракарпаральнага апладнення», а таксама пастанаўленне Савета Міністраў №313, у якіх рэгулююцца пытанні правядзення бясплатнага ЭКА ў Беларусі.
Нагадаем: згодна з указам №100, які Лукашэнка падпісаў у сакавіку, звярнуцца па бясплатную спробу ЭКА могуць як сем’і (абавязкова, каб і муж, і жонка мелі беларускае грамадзянства), так і жанчыны, якія не знаходзяцца ў шлюбе.
Пры гэтым, узрост жанчыны пры першай бясплатнай спробе ЭКА не павінен быць больш за 40 гадоў. У выпадку, калі першая спроба скончылася нараджэннем дзіця, жанчына мае права на правядзенне другой бясплатнай спробы за кошт дзяржавы. Другую спробу можна рабіць да 49 гадоў.
Калі першая бясплатная спроба была няўдалай, то другі раз за кошт дзяржавы зрабіць працэдуру нельга.
Пастанаўленне Савета Міністраў №313 скараціла спіс арганізацый, дзе можна зрабіць ЭКА за кошт дзяржавы.
Раней бясплатныя спробы праводзілі на базе Гомельскага абласнога дыягнастычнага медыка-генетычнага цэнтра з кансультацыяй «Шлюб і сям'я», гарадскога клінічнага радзільнага дома №2 Мінска, а таксама рэспубліканскага навукова-практычнага цэнтра «Маці і дзіця».
Цяпер жа звяртацца трэба выключна ў РНПЦ «Маці і дзіця» — толькі там будуць рабіць бясплатныя спробы экстракарпаральнага апладнення.
Але трэба разумець, што за некаторыя рэчы ўсё адно прыйдзецца плаціць — напрыклад, жанчына, якая не знаходзіцца ў шлюбе, мусіць самастойна прафінансаваць набыццё сперматазоідаў ананімнага донара.
ЭКА на бюджэтнай аснове ў Беларусі робяць з 2021 года. Згодна з афіцыйнай статыстыкай, за чатыры гады (дадзеныя агучылі летась у кастрычніку) правялі 6095 цыклаў экстракарпаральнага апладнення ў выніку якіх наступіла 2424 цяжарнасці (прыкладна ў 40% выпадкаў). На гэта дзяржава выдаткавала каля 22 мільёнаў рублёў.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку23
Каментары