Калі ў Сірыі адбудзецца новая атака з выкарыстаннем хімічнай зброі, ЗША і саюзнікі дадуць неадкладны і адпаведны адказ. Пра гэта гаворыцца ў новай заяве Белага дома, якая тычыцца сітуацыі ў правінцыі Ідліб.
У заяве пацвярджаецца раней выказанае Дональдам Трампам сцвярджэнне, што падобная атака будзе «безразважнай эскалацыяй і без таго трагічнага канфлікту» і паставіць пад пагрозу жыцці сотняў тысяч людзей. «Наша пазіцыя застаецца нязменнай: калі прэзідэнт Башар Асад зноў абярэ шлях выкарыстання хімічнай зброі, ЗША і саюзнікі дадуць неадкладны і адпаведны адказ», — падкрэслілі ў Белым доме.
Раней з аналагічнай перасцярогай Дональд Трамп звярнуўся да ўладаў Расіі і Ірана, паказаўшы на небяспеку наступу ў правінцыі Ідліб. «Рускія і іранцы здзейснілі б сур'ёзную гуманітарную памылку, прыняўшы ўдзел у гэтай патэнцыйнай чалавечай трагедыі … Не дазваляйце гэтаму здарыцца!» — заявіў Трамп, каментуючы паведамленні аб падрыхтоўцы наступу лаяльных Башару Асаду сіл.
Правінцыя Ідліб на поўначы Сірыі застаецца адным з нешматлікіх рэгіёнаў краіны, якія застаюцца пад кантролем тэрарыстаў і ўмеранай апазіцыі. У Ідліб былі эвакуяваныя розныя фарміраванні баевікоў з іншых правінцый, якія апынуліся пад кантролем афіцыйнага Дамаска.
Цяпер чытаюць
«Я еду натхніцца ўкраінцамі». Святлана Ціханоўская пачала афіцыйны візіт ва Украіну15
Каментары