Пра здарэнне выданню «Кур'ер» распавялі ў Слуцкім РАСК.
Муж і жонка — жыхары Слуцка. Яны прыехалі на дачу ў вёску Мялешкі, каб улетку сачыць за гаспадаркай, збіраць ураджай.
Раніцай 12 верасня 63-гадовая Марыя [імя зменена] рабіла варэнне, яе муж Міхаіл [імя зменена] прыбіраў у двары. Каля хлява ляжала салома. Калі мужчына стаў яе разграбаць, з кучы вылецеў рой восаў. Яны напалі на мужчыну: 3 разы ўкусілі ў твар і 1 раз у руку.
Міхаіл прыйшоў да жонкі, распавёў, што здарылася. Пачуваўся ён нармальна, таму пайшоў далей займацца справамі па гаспадарцы.
Праз 10 хвілін убачыў, як за Марыяй, якая бяжыць з агарода, ляціць рой восаў. Яна адмахвалася касынкай, крычала, клікала на дапамогу. Мужчына схапіў дыхлафос і пабег да яе. Вос удалося разагнаць.
Марыі стала дрэнна, яна вярнулася на кухню і прысела на крэсла, зняўшы кофту. Восы ўкусілі жанчыну 4 разы ў вобласць грудзей, у жывот.
Праз 5 хвілін мужчына вярнуўся ў дом і ўбачыў, што яго жонка ляжыць на падлозе і ледзь дыхае. Ён спрабаваў напаіць яе вадой. Марыя не рэагавала. Міхаіл выклікаў доктара.
Прыехала вясковая «хуткая». Дактары памералі жанчыне ціск, зрабілі ўкол. Але гэта не дапамагло. Каля 10-й раніцы жанчына памерла. Слуцкія медыкі канстатавалі смерць жанчыны.
Паводле папярэдняй версіі, у Марыі была алергія і яна памерла ад анафілактычнага шоку. Дакладная прычына смерці будзе вядомая па выніках судмедэкспертызы ў рамках праверкі.
У гэты ж дзень да Міхаіла прыехалі супрацоўнікі МНС. Яны акуратна спалілі кучу саломы разам з асіным гняздом.
Каментары