Стэнаграма нарады пра эфэктыўнасьць мераў па барацьбе зь неэфэктыўнымі нарадамі. Фэльетон Лёліка Ушкіна.
Стэнаграма нарады пра эфэктыўнасьць мераў па барацьбе зь неэфэктыўнымі нарадамі. Фэльетон Лёліка Ушкіна.
Такім чынам, вынікі нарады выявілі, што сярод нашых кіраўнікоў пануе фармалізм. Хоць я дастаткова доўга чакаў, калі будуць выкананыя мае даручэньні па татальным выкараненьні з жыцьця нашага грамадзтва ліха, імя якому — неэфэктыўныя нарады па эфэктыўнасьці мераў барацьбы з чым бы там ні было, — усё застаецца як і раней. Нашая краіна займае высокую пазыцыю ў сусьветных рэйтынгах па ўзроўні эфэктыўнасьці правядзеньня нарадаў па эфэктыўнасьці мераў па барацьбе з чым бы там ні было і мы павінныя не дапусьціць адваротнага!
Мне ўвесь час дакладваюць: там затрымалі ўрача, які правёў дрэнную нараду па эфэктыўнасьці мераў па барацьбе з грыпам; там ідэоляг ЖЭСу арганізаваў слабую нараду па праблемах вывазу сьмецьця. Аднак ніводнага слова ня кажуць пра асобаў з найвышэйшых эшалёнаў улады.
Хоць факты відавочныя. Колькі разоў я прасіў правесьці на рэспубліканскім узроўні добрую нараду наконт махінацыяў з кватэрамі? І што? Думаеце, вядучы, як Карабас‑Барабас, гнеўна круціў вачмі і кідаўся пагрозамі? Не! Усё прайшло ціха, пасядзелі, пакалякалі, як там БАТЭ згуляў, і разышліся. І гэта яшчэ ня ўсё! Цягам усёй нарады ні разу не прагучаў выраз: «І меры будуць прынятыя жастачайшыя». Людзі ж падумаюць, што ў нас урад нічым не займаецца!
Абсалютна запушчаная справа ў галіне мімікі і жэстыкуляцыі. Дзяржкантроль мяне пэрыядычна інфармуе, што некаторыя губэрнатары падчас нарадаў ня стукаюць па стале кулаком і ня робяць жудасных грымасаў! Не кажу ўжо пра тэмбр голасу. Ёсьць у нас чыноўнікі, якія на нарадах гавораць фальцэтам! Пра што тут можна казаць?
А кадравы пратэкцыянізм? Чаму падчас нарады пра эфэктыўнасьць мераў па барацьбе за нарыхтоўку кармоў кіраўнік абласной вэртыкалі не наехаў на свайго зама? Бо гэта ягоны швагер у чацьвертай стрэчы, як дакладае Дзяржкантроль. Галоўнае — пакрыць сваіх!
Але ня выйдзе! Таму генпракурору загад — прымусіць усіх чыноўнікаў прайсьці акторскія курсы, абнавіць лексыкон фразамі кшталту «па сьценцы ўсіх размажу, галовы палятуць, рогі паадшыбаю, калі плян праваліце». Тэрмін выкананьня — дзесяць дзён. Хачу падкрэсьліць — усе, хто думае, што гэтай нарадай усё абмяжуецца, жорстка памыляюцца. Я асабіста буду праглядаць выпускныя акторскія працы ўсіх кіраўнікоў аблвыканкамаў, і калі скажу «ня веру» — літасьці не чакайце.
Інакш стабільнасьць, якую мы будавалі гадамі, можа абрынуцца ў адначасьсе.
Каментары