Usim čynoŭnikam — prajści aktorskija kursy

Stenahrama narady pra efektyŭnaść mieraŭ pa baraćbie ź nieefektyŭnymi naradami. Feljeton Lolika Uškina.

Takim čynam, vyniki narady vyjavili, što siarod našych kiraŭnikoŭ panuje farmalizm. Choć ja dastatkova doŭha čakaŭ, kali buduć vykananyja maje daručeńni pa tatalnym vykaranieńni z žyćcia našaha hramadztva licha, imia jakomu — nieefektyŭnyja narady pa efektyŭnaści mieraŭ baraćby z čym by tam ni było, — usio zastajecca jak i raniej. Našaja kraina zajmaje vysokuju pazycyju ŭ suśvietnych rejtynhach pa ŭzroŭni efektyŭnaści praviadzieńnia naradaŭ pa efektyŭnaści mieraŭ pa baraćbie z čym by tam ni było i my pavinnyja nie dapuścić advarotnaha!

Mnie ŭvieś čas dakładvajuć: tam zatrymali ŭrača, jaki pravioŭ drennuju naradu pa efektyŭnaści mieraŭ pa baraćbie z hrypam; tam ideolah ŽESu arhanizavaŭ słabuju naradu pa prablemach vyvazu śmiećcia. Adnak nivodnaha słova nia kažuć pra asobaŭ z najvyšejšych ešalonaŭ ułady.

Choć fakty vidavočnyja. Kolki razoŭ ja prasiŭ pravieści na respublikanskim uzroŭni dobruju naradu nakont machinacyjaŭ z kvaterami? I što? Dumajecie, viadučy, jak Karabas‑Barabas, hnieŭna kruciŭ vačmi i kidaŭsia pahrozami? Nie! Usio prajšło cicha, pasiadzieli, pakalakali, jak tam BATE zhulaŭ, i razyšlisia. I heta jašče nia ŭsio! Ciaham usioj narady ni razu nie prahučaŭ vyraz: «I miery buduć pryniatyja žastačajšyja». Ludzi ž padumajuć, što ŭ nas urad ničym nie zajmajecca!

Absalutna zapuščanaja sprava ŭ halinie mimiki i žestykulacyi. Dziaržkantrol mianie peryjadyčna infarmuje, što niekatoryja hubernatary padčas naradaŭ nia stukajuć pa stale kułakom i nia robiać žudasnych hrymasaŭ! Nie kažu ŭžo pra tembr hołasu. Jość u nas čynoŭniki, jakija na naradach havorać falcetam! Pra što tut možna kazać?

A kadravy pratekcyjanizm? Čamu padčas narady pra efektyŭnaść mieraŭ pa baraćbie za narychtoŭku karmoŭ kiraŭnik abłasnoj vertykali nie najechaŭ na svajho zama? Bo heta jahony švahier u čaćviertaj strečy, jak dakładaje Dziaržkantrol. Hałoŭnaje — pakryć svaich!

Ale nia vyjdzie! Tamu hienprakuroru zahad — prymusić usich čynoŭnikaŭ prajści aktorskija kursy, abnavić leksykon frazami kštałtu «pa ściency ŭsich razmažu, hałovy palatuć, rohi paadšybaju, kali plan pravalicie». Termin vykanańnia — dziesiać dzion. Chaču padkreślić — usie, chto dumaje, što hetaj naradaj usio abmiažujecca, žorstka pamylajucca. Ja asabista budu prahladać vypusknyja aktorskija pracy ŭsich kiraŭnikoŭ abłvykankamaŭ, i kali skažu «nia vieru» — litaści nie čakajcie.

Inakš stabilnaść, jakuju my budavali hadami, moža abrynucca ŭ adnačaśsie.

• 0
• 0
• 0
• 0
• 0
• 0
• 0
• 0