Жанчыны правялі два дні без ежы пад сценамі мінскага СІЗА, пасля чаго спынілі галадаць.
Распачала галадоўку мінчанка Марына Мацулевіч. Яе сын атрымаў 13 гадоў па «антынаркатычным» артыкуле 328.
«У суботу я прыехала ў СІЗА забраць рэчы сына. Яго хутка перавядуць у калонію, частку рэчаў туды браць нельга… Ну і на эмоцыях вырашыла абвесціць галадоўку. Села з тымі рэчамі пад Валадаркай. Напісала ў фэйсбуку. Пабачыўшы допіс, прыехалі людзі, прывезлі мне цёплых рэчаў», — кажа Мацулевіч.
Ноч з суботы на нядзелю жанчына правяла пад сценамі СІЗА. У нядзелю да яе далучылася Наталля Старавойт з Гродна, вырашыла падтрымаць сяброўку па няшчасці. Сын Старавойт таксама сядзіць за наркотыкі.
Уначы ў нядзелю пачаўся дождж, таму жанчыны з’ездзілі дадому пераночыць. Раніцай у панядзелак, 8 кастрычніка, Марына Мацулевіч вярнулася пад Валадарку. Кажа, яшчэ галадае, але «пасля абеду» спыніць свой пратэст. Старавойт ужо спыніла галадоўку, яна правяла без ежы суткі.
Мацулевіч упэўненая — яе крок прыцягнуў трохі ўвагі. Гэтага дастаткова. Неўзабаве яе сына мусяць вызваліць, перакананая жанчына.
«У артыкуле 328 ёсць дадатак, што калі асоба супрацоўнічае са следствам, то пазбаўляецца крымінальнай адказнасці. Мой сын выконваў усе патрабаванні следчых, пайшоў на кантакт, таму, я ўпэўненая, яго неўзабаве адпусцяць. Спадзяюся, пракуратура разбярэцца, — кажа Мацулевіч. — А галадоўка эфектыўная была, таму, што пра гэта пачалі пісаць журналісты.
Далей галадаць сэнсу няма, навошта псаваць здароўе?».
Каментары