Аляксандр Лукашэнка запаліў сёння калядную свечку ля іконы святога князя Аляксандра Неўскага ў Храме-помніку ў гонар Усіх Святых.
Ля царквы кіраўніка дзяржавы сустрэлі Патрыяршы Экзарх усяе Беларусі, Мітрапаліт Мінскі і Заслаўскі Павал, протаіерэй Фёдар Поўны, упаўнаважаны па справах рэлігій і нацыянальнасцяў Леанід Гуляка і мэр сталіцы Анатоль Сівак.
Аляксандр Лукашэнка пасля прыезду да храма ўсклаў кветкі да помніка Алексію II і агледзеў званы, якія будуць устаноўлены на званіцы храма-помніка. Кіраўнік дзяржавы азнаёміўся з роспісам царквы і запаліў калядную свечку ля іконы святога князя Аляксандра Неўскага.
Падчас набажэнства кіраўнік дзяржавы адзначыў, што свята Раства для беларускага народа — больш чым хрысціянская традыцыя. Яно аб'ядноўвае людзей, незалежна ад ступені духоўнасці і сілы веры, закранае ў сэрцах глыбінныя пачуцці: жаданне любіць, дараваць, жыць у міры і згодзе.
«Сама атмасфера гэтай урачыстасці настройвае на добрыя справы. Менавіта ў калядныя дні больш за ўсё праводзіцца дабрачынных, іншых розных мерапрыемстваў. І я шчыра ўдзячны ўсім, хто праяўляе клопат пра людзей, якія апынуліся ў цяжкай жыццёвай сітуацыі, — заявіў кіраўнік дзяржавы. — Гэта павінна быць наша чалавечая патрэба. Ты сёння дапаможаш людзям, якія ў гэтым маюць патрэбу, - заўтра людзі дапамогуць табе».
«У розныя часы беларуская зямля губляла мільёны сыноў і дачок, якія, не шкадуючы свайго жыцця, абаранялі сваю Радзіму, — канстатаваў ён. — Лёсы многіх бясследна сцер час. Але імёны герояў мінулага стагоддзя і нашых дзён мы ўвекавечылі, пабудаваўшы гэты велічны храм-помнік. Ён аднагодак нашай маладой, суверэннай і незалежнай дзяржавы. Усё ў гэтым праекце, ад ідэі да ўвасаблення задумы, служыць галоўнай мэце — захаванню гістарычнай памяці, сцвярджэнню міру і згоды ў грамадстве»
Крыпта храма-помніка, з'яўляючыся сімвалам справядлівасці і талерантнасці, беражэ імёны герояў, незалежна ад іх нацыянальнасці і веравызнання, захоўвае зямлю з розных куткоў свету, дзе змагаліся беларускія ваяры.
«Гісторыю не змяніць, яе нельга і забыць. Бо няма лепшай абароны, чым памяць аб трагічным мінулым. Мы цэнім мір, бо былі сведкамі гора і жахаў войнаў, як ніякі іншы народ у свеце. Беларусы гэта выпрабавалі спаўна. Мы цэнім мір і заклікаем усе народы да сяброўства і супрацоўніцтва. і ў гэтай місіі наша дзяржава, беларускі народ, наша царква заўсёды былі адзіныя», — звярнуў увагу Аляксандр Лукашэнка.
Ён яшчэ раз павіншаваў усіх прысутных з Калядамі, пажадаўшы грамадзянам здароўя і дабрабыту. «Хай на нашай зямлі нараджаюцца дзеці. Нам вельмі важна, каб іх было шмат. Хай у іх будзе шчаслівае дзяцінства і доўгае цікавае, яркае жыццё - усё гэта залежыць толькі ад нас. А наша прыгожая і моцная Беларусь заўсёды дзякуючы нашаму розуму і рукам будзе квітнеючай у свеце. І ў імя гэтага мы павінны зрабіць усё. Менавіта гэта я хачу падкрэсліць ў гэты светлае свята Раства. Менавіта да гэтага заклікаю ўсіх нас у гэты дзень», - рэзюмаваў ён.
Кіраўнік дзяржавы перадаў у дар храму-помніка ў гонар Усіх Святых ікону «Нараджэнне Хрыстова».
Аляксандру Лукашэнку зрабілі ў падарунак спецыяльны выпуск Евангелля, распрацаваны для асвячэння галоўнага прастола Храма-помніка ў гонар Усіх Святых. Кожны разварот кнігі змяшчае адпаведныя па змесце тэксты на царкоўна-славянскай і рускай мовах з указаннем паралельных месцаў. Выданне пакрыта акладам, вырабленым з латуні ў тэхніцы златавустаўскай гравюры на сталі.
Цяпер чытаюць
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў21
Каментары