11 студзеня на складзе гатовай прадукцыі забойнага цэха РУП «Беларуснафта-Асобіна» правялі інвентарызацыю і выявілі прапажу 17 тон мяса птушкі — на суму амаль 57 тысяч рублёў. Работнікі кажуць, што спачатку нястачу хацелі павесіць на іх, але зараз абяцаюць правесці расследаванне.
— Начальнік склада прынёс спіс, насупраць кожнага прозвішча — сума, якую трэба заплаціць. Некаторыя падпісвалі і згаджаліся, — распавядае працаўніца прадпрыемства Лідзія. — А ўчора нас сабраў генеральны і сказаў, што ён усё сам праверыць. Будзем глядзець, што будзе далей.
Паводле слоў работнікаў прадпрыемства, гаворка ідзе пра сумы ад 700 да 1000 рублёў кампенсацыі з чалавека.
Праваабаронца Леанід Судаленка распавёў, што да яго звярнуліся 7 працаўнікоў прадпрыемства.
— Людзі прыйшлі і расказалі, што два месяцы таму ўсё было добра, а 11 студзеня наймальнік правёў інвентарызацыю і выявілі гэтую нястачу. Падзялілі на ўсіх матэрыяльна адказных, а гэта 59 чалавек, і тут жа іх пачалі патрабаваць: маўляў, плаціце добраахвотна, а інакш звольнім.
Судаленка лічыць, што патрабаванне наймальніка незаконна.
Ён дапамог тым, хто звярнуўся, падрыхтаваць заяву ў камісію па працоўных спрэчках з патрабаваннем, каб прэтэнзіі з работнікаў знялі. «Калі не, то мы пойдзем у суд і будзем даказваць адсутнасць віны кожнага таго, хто звярнуўся да нас», — кажа юрыст.
У прэс-службе ПА «Беларуснафта», даччыным прадпрыемствам якога з'яўляецца птушкафабрыка, распавялі, што ніякіх загадаў аб прыцягненні работнікаў да матэрыяльнай адказнасці пакуль што не выдавалася.
Цяпер чытаюць
Былога супрацоўніка контрразведкі КДБ арыштавалі за здраду дзяржаве11
Каментары