Ёахім Леў паведаміў форварду Томасу Мюлеру, а таксама абаронцам Матсу Хумельсу і Джэрому Баатэнгу, што больш не плануе выклікаць іх у зборную Нямеччыны. Трэнер заявіў футбалістам пра сваё рашэнне ў аўторак на сустрэчы ў Мюнхене, паведамляе прэс-служба нямецкай зборнай.
«Мы хочам працягнуць змены, якія пачалі ў мінулым годзе. Мюлер, Хумельс і Баатэнг больш не будуць выклікацца ў зборную. Мне было важна растлумачыць гэтае рашэнне футбалістам «Баварыі» пры асабістай сустрэчы. Настаў час вызначыцца з будучым зборнай Германіі, даць камандзе новае аблічча. Перакананы, што гэта правільны крок», — цытуе Лёва Bild.
«Я засмучаны гэтай навіной, бо для мяне заўсёды было важна выступаць за каманду Нямеччыны», - напісаў Баатэнг.
Баатэнг выступаў за зборную з 2009 года. 30-гадовы футбаліст правёў у нацыянальнай камандзе 75 матчаў, забіўшы адзін гол. Хумельс дэбютаваў у зборнай у 2010-м, згуляў 70 матчаў і забіў пяць мячоў. На рахунку 29-гадовага Мюлера 38 галоў у 100 гульнях.
У 2014 годзе яны заваявалі ў складзе зборнай Германіі залатыя медалі на чэмпіянаце свету ў Бразіліі.
Нямеччына — супернік зборнай Беларусі ў адборачным турніры да Еўра-2020. Каманды гуляюць у адной групе з Галандыяй, Паўночнай Ірландыяй і Эстоніяй. У Барысаве зборныя Нямеччыны і Беларусі згуляюць 8 чэрвеня.
Цяпер чытаюць
«Ні тады, ні сёння я не лічу, што зрабіў штосьці кепскае». Дзядок шчыра расказаў пра былыя адносіны з 16‑гадовай дзяўчынай43
Каментары