Юрый Бондар стаў госцем перадачы «Нічога асабістага», якую вядзе кіраўнік тэлеканала АНТ Марат Маркаў. Міністр культуры адказаў, у тым ліку, пра развіццё беларускай мовы.
Марат Маркаў спаслаўся на выступ Аляксандра Лукашэнкі на «Вялікай размове», прысвечаны беларускай мове:
«Беларусь нічога не страціла ад таго, што ў краіне дзве дзяржаўныя мовы. Тым не менш, беларускую мову трэба падтрымліваць. І мы гэтую падтрымку бачым літаральна паўсюль.
Мяняюцца назвы вуліц, бачым на білбордах, нават людзі з асалодай носяць майкі з беларускім арнаментам і надпісамі на беларускай мове. Апошнія сустрэчы паказалі, што некаторыя суседзі з заклапочанасцю ставяцца, што ў краіне падтрымліваецца беларуская мова, і ўспрымаюць ледзь не як праяву нацыяналізму. У якім кірунку гэтая падтрымка павінна развівацца далей?»
На гэта міністр адказаў наступнае: «Гэта цяжкое пытанне, якое ляжыць у плоскасці грамадскай свядомасці, якая не мяняецца хутка. Мы тады загаворым на беларускай мове, калі адчуем у гэтым патрэбу. Адчуем патрэбу зрабіць выбар на карысць беларускай мовы. Рэвалюцый тут не трэба.
Я катэгарычна супраць адміністрацыйных мераў па ўкараненні беларускай мовы, мы гэта прайшлі ў пачатку 1990-х. Калі я працаваў ва ўніверсітэце, то з цікавасцю знайшоў у рэктарскім архіве дакумент з Міністэрства культуры, дзе адзначалася паставіць рэктару пад увагу, што «вельмі марудна ідзе ўкараненне беларускай мовы ў навучальны працэс універсітэта» [Бондар гаварыў па-руску, але гэтую фразу сказаў па-беларуску — «НН»].
Шокавая тэрапія шкодная і некамфортная. Я не скажу, што ў нас у краіне мала робіцца для падтрымкі беларускай мовы. Гэта і беларускамоўны рэпертуар нашых тэатраў: Янкі Купалы, Якуба Коласа, сучаснай беларускай драматургіі, тэатр юнага гледача. Яны маюць 100% рэпертуара на беларускай мове, пастаноўкі праходзяць пры поўным аншлагу».
У сваю чаргу Марат Маркаў сказаў, што пастанавіў раз на месяц праводзіць на АНТ выпуск навін і ранішні эфір на беларускай мове, а ў перспектыве гэта пашырыць. «А ці ёсць у Мінкульта план для падтрымкі вырабу кіна– і відэакантэнту на беларускай мове?» — спытаў Маркаў.
На жаль, адказу на гэтае пытанне так і не прагучала. Бондар замест словаў пра падтрымку стаў апераваць лічбамі: «Мы нядаўна падлічвалі, колькі ж стужак было выпушчана па-беларуску за апошнія 20 гадоў. Выйшла каля 40%, улічваючы анімацыю, дакументальнае кіно, мастацкае».
Глядзі таксама:
Дэпутат, пісьменнік, «Казанова» — пяць фактаў пра міністра культуры Юрыя Бондара
Цяпер чытаюць
«Месячны плацеж пацягне на 340 рублёў». Што будзе ў Беларусі з мабільным інтэрнэтам?12
Каментары