Лукашэнка — Румасу: Навошта вы мне апісваеце ўвесь свой гераізм?

Аляксандр Лукашэнка сабраў сёння нараду па актуальных пытаннях эканомікі, піша БелТА

«Традыцыйна па ініцыятыве ўрада мы сёння абмяркуем блок эканамічных пытанняў. Бягучых і, калі трэба, на перспектыву. Хацелася б пачуць ад прэм'ер-міністра і віцэ-прэм'ераў, якая сітуацыя ў нас з экспартам. Натуральна, найважнейшае пытанне — валавы ўнутраны прадукт. Які ў нас рух у гэтым кірунку?»

«Афіцыйную статыстыку я ведаю. На што мы ў выніку такой дынамікі выйдзем на канец года, з якімі паказчыкамі? Але экспарт мяне хвалюе больш за ўсё. Бо гэта паступленні валюты ў краіну, без якой нам вельмі складана існаваць, ды і эканоміцы развівацца таксама», — дадаў ён.

Аляксандр Лукашэнка асобна пацікавіўся, як ідуць справы ў гандлі і эканамічным супрацоўніцтве з Расіяй і Еўрасаюзам. «Два асноўныя нашы партнёры. Нават Еўрапейскі саюз па экспарце зараз апярэджвае Расійскую Федэрацыю», — адзначыў беларускі лідар.

Кіраўнік дзяржавы нагадаў аб задачы па дыверсіфікацыі беларускага экспарту: па траціне ад агульнага аб'ёму на рынкі Расіі, Еўрасаюза і краін далёкай дугі адпаведна. «Тады экспарт можна лічыць дыверсіфікаваным», — падкрэсліў Аляксандр Лукашэнка.

Ён пазначыў для абмеркавання і наяўныя праблемныя пытанні ў гандлёва-эканамічным супрацоўніцтве, у прыватнасці з Расіяй. «Нашумелая праблема «атрутнай» гэтай нафты. Якая цяпер сітуацыя ў нас у гэтым плане? Я прачытаў даклад і вярнуў яго прэм'ер-міністру. Вы мне больш не пішыце гэтыя даклады. Вы проста губляеце час, — сказаў ён. — Трэба два радкі: чаго вы дамагліся станоўчага за апошні час. Навошта вы мне апісваеце увесь свой гераізм, з кім вы там сустракаліся, з кім размаўлялі, што абмяркоўвалі, як? Мне патрэбен вынік».

«Другое пытанне — яно так і не знята — пастаўкі сельгаспрадукцыі на расійскі рынак. Паводле маёй інфармацыі, на сёння каля 60 беларускіх прадпрыемстваў поўнасцю або часткова закрыты для паставак на расійскі рынак. Дапрацаваць да таго (чаго не было раней), што мы ўжо падпісаныя гандлёвыя балансы па сельгаспрадукцыі ня выконваем у сувязі з тым, што Расея не выконвае свае абавязацельствы. Чаму не прымаюцца меры?» — паставіў пытанне кіраўнік Беларусі.

На нарадзе мяркуецца абмеркаваць і шэраг іншых пытанняў эканамічнага характару. «Я чаму на ранняй стадыі ў гэтым годзе звяртаю вашу ўвагу на гэтыя праблемы - каб потым у чацвёртым квартале гераічна не прыйшлося пераадольваць гэтыя пытанні і наганяць упушчанае», — дадаў кіраўнік дзяржавы.

• 0
• 0
• 0
• 0
• 0
• 0
• 0
• 0