«Я Пуціну сказаў: «Калі ёсць думка, што мы можам увайсці ў склад Расіі, — выкінь гэта з галавы»
Беларусь мае намер развіваць інтэграцыйныя працэсы з Расіяй, не асцерагаючыся за свой суверэнітэт і незалежнасць. Пра гэта Аляксандр Лукашэнка заявіў 26 верасня на сустрэчы з прадстаўнікамі ўкраінскіх СМІ. Фрагменты інтэрв'ю прадэманстравалі ў эфіры тэлеканала АНТ, паведамляе Tut.by.
— Занадта шмат не тое што пустых, а абсалютна няправільных размоваў вакол абмеркавання нашых інтэграцыйных працэсаў з Расійскай Федэрацыяй. Усе асцерагаюцца. А чаго асцерагаецеся? Мы ёсць суверэнная, незалежная дзяржава. Не менш як Украіна. Так, на нас уплывае Украіна, на нас ўплывае Польшча — у рознай ступені, балтыйскія краіны — у меншай ступені. У большай — Расійская Федэрацыя. Свет ўзаемазалежны, — сказаў Лукашэнка.
Пры гэтым ён дадаў, што Беларусь будзе ўмацоўваць сваю незалежнасць, чаго б гэта ні каштавала.
— Мы калі з Уладзімірам Уладзіміравічам Пуціным абмяркоўвалі гэту праблему (я яе падняў), я яму проста сказаў: «Калі ў вас ва ўрадзе або ў цябе думка пра тое, што мы можам увайсці ў склад Расіі ці неяк аб'яднацца з Расійскай Федэрацыяй у адну дзяржаву, — выкінь гэта з галавы».
Чыста эмацыйна, скажыце, я першы прэзідэнт у гісторыі незалежнай і суверэннай дзяржавы. Скажыце, я што, першы прэзідэнт для таго, каб пабудаваць гэту дзяржаву і некуды яе ўключыць? Ён мне кажа: «Так Гасподзь з табой. Няма нават думкі такой». Такі быў яго адказ, — распавёў Лукашэнка.
Ён дадаў, што ў Беларусі таксама гавораць аб тым, што ён мае намер «здаць незалежнасць і суверэнітэт.
— Глупства поўнае. Пляваць мне на маю гэтую ўладу. Я 25 гадоў прэзідэнт, і я што, на 26-м годзе свайго прэзідэнцтва павінен паставіць крыж не толькі на 25-гадовай незалежнай Беларусі, якой я як магу, так і кірую, але і наогул на марах беларусаў, якія стагоддзямі марылі быць незалежнымі? Не настолькі я трымаюся за гэта крэсла, каб здаць краіну, — дадаў Аляксандр Лукашэнка.
Каментары