«Людзі да гэтага не гатовыя». Роспіс мастачкі Зоі Луцэвіч у сталічным пад'ездзе зафарбавалі
Некалькі дзён таму прафесійныя мастакі бясплатна размалявалі сцены ў пад'ездзе. Дзве мясцовыя жыхаркі засталіся незадаволеныя і паскардзіліся ў ЖЭС. У выніку мастачка Зоя Луцэвіч з іншымі жыхарамі зафарбавалі сваю працу, піша Tut.by.
Нагадаем, прыяцелька беларускай мастачкі Зоі Луцэвіч прапанавала ёй распісаць пад'езд, дзе даўно не было рамонту. Але мастакі пачалі працу без апытання жыхароў, а гэта абавязковая ўмова для таго, каб малюнак узгадніў ЖЭС. Таму што лесвічная пляцоўка — гэта месца агульнага карыстання.
Дзве жыхаркі пад'езда вырашылі, што такі роспіс — не мастацтва, сталі абражаць мастакоў, паскардзіліся ў ЖЭС, а калі праца была скончаная, жанчыны сказалі, што выклічуць міліцыю і мастакам пагражае вялікі штраф.
— Гэтыя жанчыны мяне папярэдзілі, што ў мяне будуць каласальныя праблемы, калі я не зафарбую працу. Таму я ў шэсць раніцы ўсе зафарбавала, мне дапамагала прыяцелька. Я нават не спрабавала збіраць подпісы для апытання, таму што гэта не мая справа, — кажа Зоя Луцэвіч.
Сцены прывялі ў ранейшы выгляд. Па словах мастачкі, некаторых жыхароў гэта засмуціла. Засмучана і прыяцелька, якая прапанавала акультурыць пад'езд.
— Я прыйшла да высновы, што людзі да гэтага не гатовы — яны не разумеюць, навошта гэта трэба. У іх сцены такія абшарпаныя, быццам там жывуць паркуршчыкі — там сляды ад абутку, у пад'ездах — смурод. Яны гатовыя жыць у брудзе. Але калі ніхто не хоча ісці ваяваць за мяне, я не пайду ваяваць за сябе, — сказала мастачка.
Цяпер чытаюць
У Францыі ад спёкі загінуў дальнабойшчык з Докшыцаў10
Каментары