«Захварэць можна і тут». Турбізнэс заклікае вандроўнікаў не панікаваць праз каранавірус, бо «прычыны сумнеўныя»

Беларускія тураператары просяць турыстаў не панікаваць праз каранавірус, а СМІ — не нагнятаць абстаноўку, бо гэта пагражае турыстычнай галіне.

У адкрытым лісце, які апублікаваў Рэспубліканскі саюз турыстычных арганізацый, адзначаецца, што Сусветная арганізацыя аховы здароўя не выдавала рэкамендацый устрымлівацца ад паездак. А прычыны для панікі, маўляў, сумнеўныя.

Павялічыць

«На фоне рэкамендацый рэгулюючага органа — Міністэрства спорту і турызму — устрымацца ад паездак у Кітай, Італію, Іран і Паўднёвую Карэю — беларускія турысты пачалі ўстрымлівацца ад паездак не толькі ў гэтыя краіны, але і прыпынілі браніраванне тураў на іншыя кірункі.

Звяртаем увагу, што ў апублікаваным дакуменце міністэрства няма забароны, а толькі рэкамендацыі, але яны, на жаль, выдадзеныя не на канкрэтны тэрмін, а ў бестэрміновым варыянце. Гэта пагаршае сітуацыю»,

— піша Саюз турарганізацый.

Яны наракаюць, што праз каранавірус церпіць і ўязны турызм, бо шэраг атэляў адмовіліся размяшчаць у сябе вандроўнікаў з Італіі, Ірана, Кітая і Паўднёвай Карэі.

У турыстычнай галіне расказваюць «Нашай Ніве», што адмена тураў — адзінкавыя выпадкі. Адмаўляюцца пакуль толькі ад паездак у Італію на перыяд каранціну да 15 сакавіка. Турфірмы ж прапануюць перанесці гэтыя падарожжы на іншы час або замяніць на іншы кірунак.

«З’явілася шмат пытанняў ад турыстаў, шмат сумневаў. Канечне, першае жаданне — наогул не ехаць нікуды. Але першы панічны настрой у размове з турагентам знімаецца, і людзі пагаджаюцца: насамрэч нічога страшнага», — пракаментавалі «НН».

Грошы за здадзеныя пуцёўкі вяртаюць не цалкам.

«Канечне, нейкі працэнт застаецца у турфірмы. У гэтай сітуацыі адмова кліента ад дамовы можа разглядацца толькі як адмова у аднабаковым парадку, па ініцыятыве самога спажыўца.

Зразумела, што чалавек адчувае небяспеку за сваё здароўе. Але захварэць можна і тут, ніхто не гарантуе, што мы ўсе застанемся здаровыя. Можна захварэць на іншую вірусную інфекцыю і праваляцца гэтак жа 2-3 тыдні ў не менш цяжкай форме.

Грошы вяртаюцца на тых умовах, якія прапісаны ў дамовах. Няма ніякіх асаблівых умоў на сёння, ніхто з краін за мяжой не аб’явіў форс-мажор».

Расказваюць таксама, што праз фэйк расійскага Першага канала (пра першую смерць у Беларусі ад каранавірусу), у беларускія кампаніі пачалі звяртацца расійскія турфірмы, каб высветліць абставіны і адмяніць заезды груп.

• 0
• 0
• 0
• 0
• 0
• 0
• 0
• 0