Урад Італіі забараніў любыя перамяшчэнні між населенымі пунктамі без паважных прычын, закрытыя школы
Прэм'ер-міністр Італіі ўвёў рэжым каранціну на ўсёй тэрыторыі краіны. Перамяшчэнне людзей паміж населенымі пунктамі дазваляецца толькі ў мэтах працы і па патрэбах здароўя.
«Застаёмся дома» — так можна назваць новы дэкрэт», — сказаў прэм'ер Джузэпэ Конці на прэс-канферэнцыі позна ўвечары 9 сакавіка.
Хмуры і стомлены, ён з'явіўся перад журналістамі ў палацы Кіджы.
Раней рэжым каранціну распаўсюджваўся на частцы тэрыторыі краіны з насельніцтвам каля 17 мільёнаў чалавек.
Спыняюць працу ўсе школы і ВНУ. Уводзіцца забарона на любыя публічныя мерапрыемствы. Забараняецца праца дамоў культуры, музеяў, басейнаў, спартзалаў, курортаў. Крамы будуць адкрытыя толькі ў працоўныя дні. Установы грамадскага харчавання будуць адкрытыя толькі з 6:00 да 18:00 і пры ўмове, калі могуць забяспечыць адлегласць паміж наведнікамі не меншую, чым 1 метр.
Некаторыя эксперты мяркуюць, што дадзеныя захады ўводзяцца запозна. Акрамя таго, італьянцы слынныя сваёй няздатнасцю выконваць законы. Тое, што ў звычайным жыцці стварае італьянскі шарм, у крытычнай сітуацыі паставіла пад пагрозу жыццё тысяч людзей.
Прэм'ер Конці заявіў, што, нягледзячы на ўвядзенне каранціну, грамадскі транспарт будзе дзейнічаць, а прадпрыемствы — працаваць у звычайным рэжыме. Гэта значыць, каранцін будзе мець, хутчэй, рэкамендацыйны характар.
Па стане на 9 сакавіка колькасць заражэнняў у Італіі перавысіла 9000. 463 чалавекі, або больш за 5% хворых, памерлі.
Біржа Мілана перажывае рэкорднае падзенне. Чым скончыцца гэты год для Італіі, цяжка прадказаць.
Цяпер чытаюць
«Праца прапагандыстаў наўрад ці чысцейшая за нашу». Экс-палітвязні адкрылі ў Варшаве свой клінінг — як пайшло?2
«Праца прапагандыстаў наўрад ці чысцейшая за нашу». Экс-палітвязні адкрылі ў Варшаве свой клінінг — як пайшло?
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1818
Каментары