Кіраўнік ініцыятыўнай групы Лукашэнкі: 50% подпісаў мы сабралі па месцы жыхарства людзей
Пра гэта Міхаіл Орда заявіў у каментары Tut.by. Кіраўнік ініцыятыўнай групы тлумачыць: подпісы збіралі не толькі на дзяржаўных, але і на прыватных прадпрыемствах.
«Што тычыцца прадпрыемстваў, то гэта і прыватныя, і дзяржаўныя арганізацыі. Але тут некалькі няправільна казаць пра «абыход прадпрыемстваў». Зборам подпісаў там, як правіла, займаюцца самі работнікі гэтых прадпрыемстваў, якія ўваходзяць у нашу ініцыятыўную групу. Пры гэтым мы арыентавалі членаў нашай групы, што сёння, улічваючы эпідэміялагічную сітуацыю, трэба старацца, каб не было збору людзей.
Члены нашай групы падчас абеду, да і пасля працы прапануюць калегам паставіць подпіс за вылучэнне нашага кандыдата.
Па месцы жыхарства подпісы збіраем таксама практычна ва ўсіх рэгіёнах. У цэлым больш за 50% подпісаў мы сабралі менавіта па месцы жыхарства людзей.
— Вы сабралі «каля 1 мільёна подпісаў» (Орда адказваў да таго, як Аляксандр Лукашэнка заявіў, што ўжо сабраў 1,5 мільёна). Колькі з іх у Мінску?
— Улічваючы, што ў сталіцы сёння пражывае досыць вялікая колькасць людзей, то і подпісаў тут за вылучэнне нашага кандыдата сабрана шмат. Але ведаеце, напэўна, няправільна будзе дзяліць — Мінск, раёны, вёскі і гэтак далей. Пры выбарах прэзідэнта ўся краіна — гэта, вобразна кажучы, адна выбарчая акруга. І кожны грамадзянін, незалежна ад месца жыхарства, мае права падпісацца за вылучэння свайго кандыдата. Прычым галасы ва ўсіх жыхароў, скажам так, аднолькавыя па вазе — няхай гэта будзе ў Мінску, у вёсцы на Палессі або чалавека, які пражывае на хутары. Таму не бачу сэнсу падзяляць і супрацьпастаўляць лічбы, - адзначыў Міхаіл Орда.
Падчас першага пікета за дзеючага прэзідэнта ў Менску Міхаіл Орда адзначыў, што пікеты ў хуткім часе будуць стаяць усюды — у людзей, якія хочуць пакінуць подпіс, ёсць запыт.
Каментары