На заснавальніка руху «Дзея» завялі дзве крымінальныя справы. Адна з іх — за ўзлом сістэмы Мінгарвыканкама
На заснавальніка руху «Дзея» завялі дзве крымінальныя справы. Адна з іх — за ўзлом сістэмы Мінгарвыканкама, паведамляе spring96.org.
Затрыманага 3 лістапада заснавальніка і сябра рады грамадскага руху «Дзея» Кіма Самусенку падазраюць ва ўзломе камп'ютарнай сістэмы Мінгарвыканкама (ч. 2 арт. 349 КК) і дзеяннях, якія груба парушаюць грамадскі парадак, у Мінску з 9 жніўня (ч. 1 арт. 342 КК). Праз два дні быў затрыманы і брат Кіма — Аляксей.
Кіма Самусенку затрымалі 3 лістапада дома пасля вобшукаў у яго дома і ў доме ягонай маці. Пасля вобшука, які, паводле праваабаронцаў, суправаджаўся стрэламі ў доме і прымяненнем фізічнай сілы, забралі ўсю тэхніку Кіма і ягонай жонкі, зарэгістраваную паляўнічую зброю, грошы, бчб-сцяг, сцяг Украіны, украінскі пашпарт жонкі і іншае.
Родным паведамілі, што мужчына затрыманы на 72 гадзіны ў межах крымінальнай справы па ч. 2 арт. 349 Крымінальнага кодэкса (Несанкцыянаваны доступ да камп'ютарнай інфармацыі). Яго змясцілі ў ізалятар часовага ўтрымання на Акрэсціна, дзе ён знаходзіцца і цяпер.
Праз два дні пасля пасля затрымання Кіма Самусенкі Следчы камітэт паведаміў, што ён і яго знаёмы датычныя да ўзлому камп'ютарнай сістэмы Мінгарвыканкама.
«Паводле звестак следства, уначы 3 лістапада 34-гадовы мужчына, знаходзячыся на тэхнічным паверсе будынка на вуліцы Прытыцкага ў Мінску, дзейнічаючы з неўстаноўленымі асобамі, з асабістай зацікаўленасці, з дапамогай камп'ютарнай тэхнікі шляхам парушэння сістэмы абароны ажыццявіў несанкцыянаваны доступ да інфармацыі, якая захоўваецца ў камп'ютарнай сетцы Мінскага гарадскога выканкама», — заявілі ў ведамстве.
Пазней, як гаворыцца ў паведамленні СК, быў затрыманы яго знаёмы, датычны да ўзлому камп'ютарнай сістэмы Мінгарвыканкама. Гаворка ідзе пра заснавальніка «Дзеі» Кіма Самусенку:
«Па даручэнні следчага па месцы жыхарства затрыманага, 31-гадовага мінчаніна, супрацоўнікамі міліцыі праведзены вобшук, у ходзе якога выяўлены шэраг рэчавых доказаў, у тым ліку агнястрэльная зброя, боепрыпасы, бронекамізэлькі, каскі, мячы, радыёстанцыі і ўлёткі з заклікамі да страйку».
Пры гэтым, як паведамлялі адразу родныя Кіма, вынятая зброя з кватэры Кіма з'яўляецца зарэгістраванай, а на бронекамізэльку ніякі дазвол не трэба.
Вядома, што па гэтай справе затрыманыя Іван Андрушойць і Аляксандр Хацкевіч. Вядома, што Іван Андрушойць знаходзіцца ў ІЧУ на Акрэсціна. Але больш падрабязнай інфармацыі пра затрыманых пакуль няма.
Каментары