Улады дапускаюць зніжэнне золатавалютных рэзерваў за 2021 год да 6 мільярдаў даляраў
Гэта вынікае з указа № 481 «Аб зацвярджэнні Асноўных напрамкаў грашова-крэдытнай палітыкі Рэспублікі Беларусь на 2021 год», які Аляксандр Лукашэнка падпісаў 22 снежня.
«У мэтах павышэння эканамічнай бяспекі краіны і забеспячэння фінансавай стабільнасці Нацыянальны банк сумесна з урадам у 2021 годзе працягне працу па падтрыманні ўзроўню міжнародных рэзервовых актываў Рэспублікі Беларусь і паляпшэнні іх структуры ў частцы памяншэння пазыковага складніка», — гаворыцца ва ўказе.
Міжнародныя рэзервовыя актывы Беларусі на 1 снежня 2020 года склалі 7,3 млрд даляраў у эквіваленце, знізіўшыся за лістапад на 109,2 млн даляраў, адзначае Tut.by.
Рэйтынгавае агенцтва Fitch прагназуе зніжэнне ЗВР Беларусі з 7,4 млрд даляраў у 2020 годзе да 6,2 млрд даляраў у 2022 годзе. Узмацненне палітычных хваляванняў у Беларусі можа абумовіць дадатковы ціск на міжнародныя рэзервы і выклікаць адток дэпазітаў, што павышае рызыкі для макраэканамічнай і фінансавай стабільнасці, гаворыцца ў прэс-рэлізе да агляду агенцтва «Палітычны крызіс у Беларусі аказвае ціск на рэйтынгі». Аднак альтэрнатыўныя крыніцы фінансавання і запас грашовых сродкаў згладжваюць рызыкі, звязаныя з фінансаваннем, на бліжэйшы час.
Згодна з указам № 481, манетарная палітыка ў 2021 годзе будзе накіраваная на стабілізацыю інфляцыі, якая вымяраецца індэксам спажывецкіх цэн, на ўзроўні не больш за 5%.
Забеспячэнне цэнавай стабільнасці будзе дасягацца Нацыянальным банкам у рэжыме манетарнага таргетавання з дапамогай кантролю над аб'ёмам грашовай прапановы. Рублёвая грашовая база павялічыцца ў 2021 годзе на 10-13%, гаворыцца ў дакуменце.
Цяпер чытаюць
«Яна не выглядала шчырай, была ў масцы». Паўлючэнка пра сустрэчу Калеснікавай з беларускімі журналістамі12
Каментары